ଆଜି ମୁହାଁ-ମୁହିଁ ହେବେ ନ୍ୟୁଜିଲାଣ୍ଡ ଓ ଆଫଗାନିସ୍ତାନ
ଆଜି ବିଶ୍ୱ କପରେ ମୁହାଁମୁହିଁ ହେବେ ନ୍ୟୁଜିଲାଣ୍ତ ଓ ଅଫଗାନିସ୍ତାନ । ଚେନ୍ନାଇର ଏମ୍ଏ ଚିଦାମ୍ବରମ୍ ଷ୍ଟାଡ଼ିୟମରେ ଖେଳାଯିବ ଏହି ମ୍ୟାଚ୍ । ଡ଼ିଫେଣ୍ତି ଚାମ୍ପଅନ୍ ଇଂଲଣ୍ତକୁ ପରାସ୍ତ କରିବା ପରେ ନ୍ୟୁଜିଲାଣ୍ତକୁ ହରାଇବା ନେଇ ଲକ୍ଷ୍ୟ ରଖିଛି ଅଫଗାନିସ୍ତାନ।ସୂଚନା ଅନୁଯାୟୀ, ବିଶ୍ୱ କପରେ ବୁଧବାର ଖେଳାଯିବ ଏହି ୧୬ତମ ଲିଗ୍ ମ୍ୟାଚ୍ । ଏମ୍ଏ ଚିଦାମ୍ବରମ୍ ଷ୍ଟାଡ଼ିୟମରେ ଦେଖିବାକୁ ମିଳିବ ନ୍ୟୁଜିଲାଣ୍ତ ଓ ଅଫଗାନିସ୍ତାନ ଲଢେଇ । ଚଳିତ ବର୍ଷ ବିଶ୍ୱ କପରେ ନ୍ୟୁଜିଲାଣ୍ତ ତିନିଟି ମ୍ୟାଚ୍ ଖେଳିଥିବା ବେଳେ ବର୍ତ୍ତମାନ ସୁଦ୍ଧା ଦଳ ଅପରାଜେୟ ରହି ପଏଣ୍ଟ ଟେବୁଲର ଦ୍ୱିତୀୟ ସ୍ଥାନରେ ରହିଛି । ତେବେ ଅଫଗାନିସ୍ତାନ ସହ ମ୍ୟାଚ୍ ପୂର୍ବରୁ ଅଧିନାୟକ କେନ୍ ୱିଲିୟମସନ୍ ଆହତ ହେବା ଦଳ ପାଇଁ ସମସ୍ୟା ବଢାଇଛି । ବାଂଲାଦେଶ ବିପକ୍ଷ ମ୍ୟାଚ୍ ବେଳେ ୱିଲିୟମସନ୍ ସିଙ୍ଗଲ୍ସ ନେବା ବେଳେ ବଲ ତାଙ୍କ ବାମ ହାତ ଆଙ୍ଗୁଳିରେ ବାଜିଥିଲା । ଆଙ୍ଗୁଳିର ହାଡ଼ ଭାଙ୍ଗି ଯିବାରୁ ଖେଳାଳି ଏକାଧିକ ମ୍ୟାଚରୁ ବାଦ ପଡ଼ିବା ନିଶ୍ଚିତ ହୋଇଛି । ସେପଟେ ଆଫଗାନିସ୍ତାନ ପ୍ରଥମ ମ୍ୟାଚରେ ବାଂଲାଦେଶ ଓ ଦ୍ୱିତୀୟରେ ଭାରତଠାରୁ ପରାସ୍ତ ହୋଇଥିଲା । ତେବେ ଗତ ୧୫ ତାରିଖ ଦିନ କୋଟଲା ଷ୍ଟାଡ଼ିୟମରେ ଆଫଗାନିସ୍ତାନ ସ୍ପିନରଙ୍କ ଧୁଆଁଧାର ବୋଲିଂ ବଳରେ ଶକ୍ତିଶାଳୀ ଇଂଲଣ୍ତକୁ ୬୯ ରନରେ ହରାଇ ଦଳ ବିଶ୍ୱ କପରେ ବଡ଼ ବିପର୍ଯ୍ୟୟ ରଚିଥିଲା । ତେବେ ଦଳକୁ ଏହି ବଡ଼ ବିଜୟର ଭେଟି ଦେଇଥିଲେ ସ୍ପିନର ରସିଦ୍ ଖାନ ଓ ମୁଜିବ ଉର-ରେହମାନ । ଏଥିସହ ଦଳର ଓପନର ରହମନୁଲ୍ଲା ଗୁରବାଜ ଫର୍ମକୁ ଫେରିଥିବା ବେଳେ ମିଡ଼ିଲ ଅର୍ଡ଼ର ବ୍ୟାଟର ଇକ୍ରାମ ଅଲିଖିଲଙ୍କ ବ୍ୟାଟିଂ ପ୍ରଶଂସନୀୟ ରହିଛି । ତେବେ ଆଜି ମଧ୍ୟ ମ୍ୟାଚ୍ ଜିତିବା ନେଇ ଲକ୍ଷ୍ୟ ରଖିଛି ଅଫଗାନିସ୍ତାନ ।
ସମ୍ଭାବ୍ୟ ନ୍ୟୁଜିଲାଣ୍ଡ ଏକାଦଶ: ଡେଭନ୍ କନୱେ, ରାଚିନ ରବୀନ୍ଦ୍ର, ମିଚେଲ ସାଣ୍ଟନର, ଡାରେଲ ମିଚେଲ, ଏମ୍ଏସ୍ ଚାପମ୍ୟାନ, ଟମ ଲଥାମ, ଗ୍ଲେନ ଫିଲିପ୍ସ, ଲୋକି ଫର୍ଗ୍ୟୁସନ, ମ୍ୟାଟ ହେନରି, ଟ୍ରେଣ୍ଟ ବୋଲ୍ଟ, ଈଶ ସୋଢ଼ୀ।
ସମ୍ଭାବ୍ୟ ଆଫଗାନିସ୍ତାନ ଏକାଦଶ: ରହମନୁଲ୍ଲା ଗୁରବାଜ, ଇବ୍ରାହିମ ଜଦ୍ରାନ, ରହମତ ଶାହ, ହସମାତୁଲ୍ଲା ସାହିଦି, ଅଜମାତୁଲ୍ଲା ଓମରଜାଇ, ମହମ୍ମଦ ନବି, ନଜିବୁଲ୍ଲା ଜଦ୍ରାନ, ମୁଜୀବ ଉର ରେହମାନ, ରସିଦ ଖାନ, ଫଜଲହକ ଫାରୁକୀ, ନବୀନ ଉଲ ହକ।