ରୁଷ ଏବଂ ୟୁକ୍ରେନ ଯୁଦ୍ଧକୁ ଏକ ସପ୍ତାହ ହୋଇଛି । ସାରା ଦୁନିଆର ସେୟାର ବଜାର ଗୁଡିକ ଉପରେ ଏହାର ପ୍ରଭାବ ଦେଖିବାକୁ ମିଳିଛି । ଏହାରି ଭିତରେ LIC IPOକୁ ନେଇ କେନ୍ଦ୍ରମନ୍ତ୍ରୀମାନଙ୍କ ଏକ ଗୁରୁତ୍ୱପୂର୍ଣ୍ଣ ବୈଠକ ମାର୍ଚ୍ଚ ୪ରେ ବସିବ । LIC IPOକୁ ଅନେକ ପ୍ରକାର ଆକଳନ କରାଯାଉଛି । ସୂତ୍ର ଅନୁସାରେ, LIC IPOର ଟାଇମଲାଇନକୁ ନେଇ କେନ୍ଦ୍ର ଅର୍ଥମନ୍ତ୍ରୀ ନିର୍ମାଳା ସୀତାରମଣ, କେନ୍ଦ୍ର ସଡକ ପରିବହନ ମନ୍ତ୍ରୀ ନିତିନ ଗଡକରୀ ଏବଂ କେନ୍ଦ୍ର ଉଦ୍ୟୋଗ ଏବଂ ବାଣିଜ୍ୟ ମନ୍ତ୍ରୀ ବୈଠକ କରିପାରନ୍ତି ।
ଏହି ବୈଠକରେ LIC IPOକୁ ଆସନ୍ତା ଆର୍ଥିକ ବର୍ଷରେ ଆଣିବା ପାଇଁ ନିଷ୍ପତ୍ତି ନିଆଯାଇପାରେ । ତେବେ କେନ୍ଦ୍ର ସରକାରଙ୍କ ପକ୍ଷରୁ ଏନେଇ କୌଣସି ସଂକେତ ମିଳି ନାହିଁ । ସରକାର LIC IPO ପାଇଁ SEBI ନିକଟରେ ଦସ୍ତାବିଜ ଜମା କରିସାରିଛନ୍ତି। LIC IPO ଦେଶର ସବୁଠାରୁ ବଡ ଆଇପିଓ ହେବ । ସମସ୍ତଙ୍କ ନଜର ଏହି ସରକାରୀ ବୀମା କମ୍ପାନୀର ଆଇପିଓ ଉପରେ ରହିଛି । LIC IPO ଜରିଆରେ କେନ୍ଦ୍ର ସରକାର ଏକ ଲକ୍ଷ କୋଟିରୁ ଅଧିକ ଟଙ୍କା ସଂଗ୍ରହର ଲକ୍ଷ୍ୟ ରଖିଥିଲେ। କିନ୍ତୁ ନିକଟରେ ଏହାର ସମୀକ୍ଷା କରି ସରକାର ଏହାର ଆକାରକୁ ହ୍ରାସ କରିଛନ୍ତି।
