ବାତ୍ୟାକୁ ନେଇ ସ୍ପଷ୍ଚୀକରଣ ଦେଲା ଆଇଏମଡି । ସମ୍ଭାବ୍ୟ ବାତ୍ୟାକୁ ନେଇ ବିଭିନ୍ନ ମଡେନ ଭିନ୍ନଭିନ୍ନ ସୂଚନା ଦେଉଥିବାବେଳେ ଭାରତୀୟ ପାଣିପାଗ ବିଭାଗ ଏହାକୁ ଖଣ୍ଡନ କରିବା ସବ ଏହା ଗୁଜବ ବୋଲି କହୁଥିଲା । ବର୍ତ୍ତମାନ ଓଡିଶାରେ ବାତ୍ୟା ସମ୍ଭାବନା ରହିଛି ବୋଲି ଆଇଏମଡି ହଁ ଭରିଛି । ଆଇଏମଡି ପକ୍ଷରୁ ସୂଚନା ଜାରି ପରେ ତତ୍ପର ହୋଇପଡିଛନ୍ତି ରାଜ୍ୟ ସରକାର ।
ସ୍ୱତନ୍ତ୍ର ରିଲିଫ କମିଶନର ଉପକୂଳବର୍ତ୍ତୀ ଜିଲ୍ଲାର ଜିଲ୍ଲାପାଳ, ଜଳ ସମ୍ପଦ, ପଞ୍ଚାୟତିରାଜ, ନଗର ଉନ୍ନୟନ, ଶକ୍ତି, ରାଜସ୍ୱ ଓ ବିପର୍ଯ୍ୟୟ ବିଭାଗର ଅଧିକାରୀଙ୍କ ସହ ଜରୁରୀ ବୈଠକ କରିଛନ୍ତି । ବାତ୍ୟା ସମ୍ଭାବନା ଥିବାରୁ ସଂପୃକ୍ତ ପଦାଧିକାରୀମାନେ ହେଡ୍ କ୍ୱାର୍ଟର ନ ଛାଡ଼ିବା ପାଇଁ ନିର୍ଦ୍ଦେଶ ଜାରି କରାଯାଇଛି । ସ୍ଥିତି ଉପରେ ନଜର ରଖିବା ସହ ସତର୍କ ରହିବାକୁ ଜିଲ୍ଲାପାଳମାନଙ୍କୁ କୁହାଯାଇଛି ।
ତେବେ ଏହି ବାତ୍ୟା ନାଁ ସି-ତ୍ରଙ୍ଗ ରହିଥିବାବେଳେ ଥାଇଲାଣ୍ଡର ଏହାର ନାମକରଣ କରିଛି । ଆନ୍ତର୍ଜାତିକ ପାଣିପାଗ ମଡେଲ୍ ଇସିଏମଡବ୍ଲ୍ୟୁଏଫର ତାଜା ଆକଳନ ହେଲା, ସମ୍ଭାବ୍ୟ ବାତ୍ୟା ୨୫ ତାରିଖ ସକାଳବେଳକୁ ଓଡ଼ିଶା ଉପକୂଳ ପାଖରେ ଥିବ । ୨୫ ଅପରାହ୍ନରୁ ସନ୍ଧ୍ୟା ମଧ୍ୟରେ ଉତ୍ତର ଓଡ଼ିଶା ଉପକୂଳରେ ବାଲେଶ୍ୱର ପାଖାପାଖି ସ୍ଥଳଭାଗ ଛୁଇଁପାରେ ।
ୱିଣ୍ଡି ଡଟକମ୍ରେ ଜିଏଫଏସ୍ ମଡେଲ୍ ପୂର୍ବାନୁମାନ ଚିତ୍ର ଦର୍ଶାଉଛି, ସମ୍ଭାବ୍ୟ ବାତ୍ୟା ୨୪ ତାରିଖ ରାତିରେ ପଶ୍ଚିମବଙ୍ଗ ସଂଲଗ୍ନ ବାଂଲାଦେଶ ଉପକୂଳରେ ମାଡ଼ ହେବା ସମ୍ଭାବନା ଅଛି । ଟପ୍ରିକାଲ ଟିଟବିଟ୍ସର ଜିଏଫଏସ୍ ମଡେଲ୍ ଆକଳନ ମଧ୍ୟ ବାଂଲାଦେଶକୁ ବାତ୍ୟା ମୁହାଁଇବା ସମ୍ଭାବନା ଦେଖାଉଛି ।
ସେହିପରି ନାଭ୍ଜେମ ମଡେଲ ଅନୁସାରେ ୨୪ ତାରିଖରେ ଓଡ଼ିଶା ଉପକୂଳରେ ବାତ୍ୟା ସ୍ଥଳଭାଗକୁ ପ୍ରବେଶ କରିପାରେ । ଆଞ୍ଚଳିକ ପାଣିପାଗ କେନ୍ଦ୍ରର ପୂର୍ବତନ ନିର୍ଦ୍ଦେଶକ ତଥା ସୋଆ ଜଳବାୟୁ ଓ ପରିବେଶ କେନ୍ଦ୍ର ନିର୍ଦ୍ଦେଶକ ଡକ୍ଟର ଶରତ ଚନ୍ଦ୍ର ସାହୁଙ୍କ ପୂର୍ବାନୁମାନ ହେଲା, ପଶ୍ଚିମ କେନ୍ଦ୍ରୀୟ ବଙ୍ଗୋପସାଗରରୁ ସମ୍ଭାବ୍ୟ ବାତ୍ୟା ଉତ୍ତର-ଉତ୍ତର ପଶ୍ଚିମ ଦିଗକୁ ଗତି କରିବ ।
ଏହା ଆନ୍ଧ୍ର, ଓଡ଼ିଶା କିମ୍ବା ପଶ୍ଚିମବଙ୍ଗ ଉପକୂଳ ଛୁଇଁପାରେ । ତେବେ ଓଡ଼ିଶା ଉପକୂଳକୁ ଆସିବା ସମ୍ଭାବନା ଅଧିକ ରହିଛି । ଯଦି ଓଡ଼ିଶା ଆସିବନି, ତେବେ ଏହା ଓଡ଼ିଶା ଉପକୂଳରେ ଘଷି ହୋଇ ପଶ୍ଚିମବଙ୍ଗକୁ ଯିବ । ଆସନ୍ତା ୨୫ ତାରିଖରେ ବାତ୍ୟା ସ୍ଥଳଭାଗ ଛୁଇଁପାରେ । ବାତ୍ୟା ପ୍ରଭାବରେ ୨୪ ଓ ୨୫ରେ ପ୍ରବଳରୁ ଅତି ପ୍ରବଳ ବର୍ଷା ହେବ । ୨୪ ଅପରାହ୍ନ କିମ୍ବା ରାତିରୁ ବର୍ଷା ବଢ଼ିବ । ଏହି ବାତ୍ୟା ପ୍ରକୋପରେ ଘଣ୍ଟା ପ୍ରତି ୧୦୦ କିମି ବେଗରେ ପବନ ହୋଇପାରେ । ତେବେ ଏହା ୨୨ ତାରିଖବେଳକୁ ଚିତ୍ର ସ୍ପଷ୍ଟ ହେବ । ସେତେବେଳେ ବାତ୍ୟାର ଗତିପଥ ଓ ତୀବ୍ରତା ନେଇ ଅଧିକ ସ୍ପଷ୍ଟ ତଥ୍ୟ ମିଳିପାରିବ ।
