ଖାଇବା ତେଲ ଦାମ ୭ ରୁ ୨୦ ଟଙ୍କା କମିଛି, ଆଗକୁ ଆହୁରି କମିବ’

ସୋୟାବିନ୍‌, ସୂର୍ଯ୍ୟମୁଖୀ ଏବଂ ପାମୋଲିନ୍‌ ଅଏଲ ଉପରେ ପୂର୍ବରୁ ୨.୫ ପ୍ରତିଶତ ବେସିକ୍‌ ଡ୍ୟୁଟି ବା ମୌଳିକ ଶୁଳ୍କ ନିଆଯାଉଥିବା ବେଳେ ଏବେ ଏହାକୁ ସମ୍ପୂର୍ଣ୍ଣ ଭାବେ ହଟାଇ ଦେବାକୁ ନିଷ୍ପତ୍ତି କରିଛନ୍ତି କେନ୍ଦ୍ର ସରକାର । ଯାହା ଫଳରେ ଖାଇବା ତେଲ ଦର ହ୍ରାସ ପାଇବ । ଗତ ବର୍ଷ ଠାରୁ ଲଗାତାର ଭାବେ ଖାଇବା ତେଲ ଦର ବୃଦ୍ଧି ପାଇବାରେ ଲାଗିଥିଲା । ଏବେ ଏଥିରେ କିଛିଟା ହ୍ରାସ ପାଇବା ଖବର ଖାଉଟିଙ୍କୁ ଆଶ୍ବସ୍ତି ଦେଇଛି । ଏହା ସହିତ ଖାଇବା ତେଲ ଉପରୁ କୃଷି ଉପକର ବା ଆଗ୍ରି ସେସ୍‌ ମଧ୍ୟ ହ୍ରାସ ପାଇଛି । ଅଶୋଧିତ ପାମୋଲିନ୍‌ ତେଲ ଉପରେ ପୂର୍ବରୁ ୨୦ ପ୍ରତିଶତ ଆଗ୍ରି-ସେସ୍‌ ନିଆଯାଉଥିବା ବେଳେ ଏବେ ତାହା ହ୍ରାସ ପାଇ ୭.୫ ପ୍ରତିଶତ ନିଆଯିବ ।

ସେହିଭଳି ଅଶୋଧିତ ସୋୟାବିନ୍‌ ତେଲ ଏବଂ ଅଶୋଧିତ ସୂର୍ଯ୍ୟମୂଖୀ ତେଲ ଉପରୁ ୫ ପ୍ରତିଶତ ଆଗ୍ରି-ସେସ୍‌ ହ୍ରାସ କରାଯାଇଛି । ସେହିଭଳି ଆରବିଡି ପାମୋଲିନ୍‌ ତେଲ, ସୋୟାବିନ ରିଫାଇନ୍ ତେଲ ଏବଂ ସୂର୍ଯ୍ୟମୂଖୀ ରିଫାଇନ ତେଲ ଉପରେ ବେସିକ୍‌ ଡ୍ୟୁଟି ୩୨.୫ ପ୍ରତିଶତରୁ ୧୭.୫ ପ୍ରତିଶତକୁ କମାଇଛି କେନ୍ଦ୍ର । ଖାଦ୍ୟ ଏବଂ ସାର୍ବଜନୀକ ବିତରଣ ବିଭାଗ ସଚିବ ସୁଧାଂଶୁ ପାଣ୍ଡେ କହିଛନ୍ତି, ଖାଇବା ତେଲ ଦାମ ଖୁବ ହ୍ରାସ ପାଇଛି । ଦେଶରେ ଅନେକ ସ୍ଥାନରେ ୭ ରୁ ୨୦ ଟଙ୍କା ଯାଏଁ ଶସ୍ତା ହୋଇଛି ଖାଇବା ତେଲ ଦାମ । ଖାଉଟିଙ୍କୁ ଆଶ୍ବସ୍ତୀ ଦେବା ପାଇଁ ଆଦାନୀ ଓ୍ବିଲମାର୍‌ ଏବଂ ରୁଚି ସୋୟା ଇଣ୍ଡଷ୍ଟ୍ରି ସହ ପ୍ରମୁଖ ତେଲ କମ୍ପାନୀ ମାନେ ଲିଟର ପିଛା ୪ ରୁ ୭ ଟଙ୍କା ଯାଏଁ ହ୍ରାସ କରିଥିଲେ ।