ମିଳିଲା ସାମାନ୍ୟ ଆଶ୍ୱସ୍ତି । ହ୍ରାସ ପାଇଲା ବିପଦସଙ୍କେତ ଉପରେ ପ୍ରବାହିତ ହେଉଥିବା ବୈତରଣୀ ନଦୀର ଜଳସ୍ତର । ସୋମବାର ସନ୍ଧ୍ୟା ସୁଦ୍ଧା ଜଳସ୍ତର ହ୍ରାସ ପାଇ ବର୍ତ୍ତମାନ ୭.୮୧ ମିଟରରେ ପ୍ରବାହିତ ହେଉଛି। କିନ୍ତୁ ଏବେବେ ଜଳବନ୍ଦୀ ଅବସ୍ଥାରେ ରହିଛି ଷୋଳମପୁର, ମାଳଦା, ନପଙ୍ଗ, କୁରିଗାଁ, ରହଣିଆ ଆଦି ପଞ୍ଚାୟତର ବହୁଗ୍ରାମ ।
ମିଳିଥିବା ସୂଚନା ଅନୁଯାୟୀ,ଅନେକ ସମସ୍ୟାର ସମ୍ମୁଖୀନ ହେଉଛନ୍ତି ଜଳବନ୍ଦୀ ହୋଇ ରହିଥିବା ଲୋକେ । ଗତ ଆଠଦିନ ଧରି ହେବ ବନ୍ୟାଜଳରେ ବୁଡିରହିଛି ହଜାର ହଜାର ହେକ୍ଟର ଚାଷଜମି ଓ ପନିପରିବା ଚାଷ । ସେହିପରି ରାସ୍ତାଘାଟ ଏବଂ ବିଦ୍ୟୁତଖୁଣ୍ଟ ବନ୍ୟାଜଳରେ ବୁଡିରହି ଥିବାରୁ ସହଜ ହେଉନାହିଁ ଯୋଗାଯୋଗ ।
ବନ୍ୟା ଜଳ ହ୍ରାସ ପାଇଥିବାରୁ ଭଣ୍ଡାରିପୋଖରୀ-ମଣିନାଥପୁର ପୁର୍ତ୍ତରାସ୍ତାରେ ଯାତାୟତ ସ୍ୱାଭାବିକ ହୋଇଛି। ଜଳନିଷ୍କାସନରେ ବିଳମ୍ବ ହେଉଥିବାରୁ ଚାଷବାସ ବିଶେଷ ଭାବେ ପ୍ରଭାବିତ ହୋଇଛି। ସ୍ୱଳ୍ପଦିନ ଅନ୍ତରରେ ଦୁଇଟି ବନ୍ୟା କୃଷକମାନଙ୍କ ମେରୁଦଣ୍ଡକୁ ଦୋହଲାଇ ଦେଇଛି। ପ୍ରଶାସନ ପକ୍ଷରୁ ବନ୍ୟାଞ୍ଚଳ ପ୍ରତି ସତର୍କ ଦୃଷ୍ଟ ରଖାଯାଇଛି।