ଓଡ଼ିଶାମୁଖ୍ୟ ଖବର

କାର୍ତିକ ପୁର୍ଣିମା

ଆମ ହିନ୍ଦୁ ଧର୍ମରେ ୧୨ ମାସରେ ୧୨ ଟି ପୂର୍ଣ୍ଣିମା ପଡିଥାଏ l କିନ୍ତୁ ଯେଉଁ ବର୍ଷ ମଳମାସ ପଡେ ପୂର୍ଣ୍ଣିମାର ସଂଖ୍ୟା ୧୩ ହୋଇଯାଏ l ହିନ୍ଦୁ ମାନେ ଏହି ଦିନଟିକୁ ଗୋଟିଏ ପବିତ୍ର ଦିନ ଭାବରେ ଗଣନା କରନ୍ତି

ହିନ୍ଦୁ ଧର୍ମ ସହିତ ଶିଖ ଧର୍ମରେ ମଧ୍ୟ କାର୍ତ୍ତିକ ପୂର୍ଣ୍ଣିମାର ବିଶେଷ ମହତ୍ୱ ରହିଛି ,ଶିଖ ଧର୍ମ ଅନୁସାରେ ଏହି ଦିନ ଶିଖ ଧର୍ମର ସଂସ୍ଥାପକ ଗୁରୁ ନାନକଙ୍କର ଜୟନ୍ତୀ ଅଟେ l କାର୍ତ୍ତିକ ପୂର୍ଣ୍ଣିମାକୁ ଅନେକ ଗୁଡିଏ ନାମରେ ଜାଣିବାକୁ ମିଳିଥାଏ l ଯେପରି କି ତ୍ରିପୁରୀ ପୂର୍ଣ୍ଣିମା ,ଦେବା ଦୀପାବଳି ଇତ୍ୟାଦି l ଏହା ଭାରତର ସବୁଠୁ ପୁରୁଣା ଓ ପ୍ରସିଦ୍ଧ ପର୍ବ ଅଟେ ,କେଉଁ ପୁରୁଣା ଯୁଗରୁ ଏହି ପର୍ବର ମହତ୍ୱ ଆମ ଭାରତରେ ରହି ଆସିଛି l ସାରା ଭାରତବର୍ଷର ଲୋକମାନେ କାର୍ତ୍ତିକ ପୂର୍ଣ୍ଣିମା ଦିନଟିକୁ ପାଳନ କାରିଥାନ୍ତି l କାର୍ତ୍ତିକ ମାସ ସାରା ଅନେକ ଲୋକ ଆମିଷ ପରିତ୍ୟାଗ କରି କାଷ୍ଠା ଭାବରେ ବ୍ରତ ପାଳିଥାନ୍ତି l

ଏହି ଦିନକୁ ନେଇ ଅନେକ ଗୁଡିଏ ତର୍କ ମଧ୍ୟ ଆମ ହିନ୍ଦୁ ଧର୍ମରେ ଦେଖିବାକୁ ମିଳିଥାଏ l କେହି କୁହନ୍ତି ଶିବଙ୍କର ଯୋଦ୍ଧା ପୁତ୍ର କାର୍ତ୍ତିକଙ୍କ ଜନ୍ମଦିନ ପାଇଁ ଏହି ଦିନ ପାଳିତ ହୁଏ l ପୁଣି ମଧ୍ୟ ଶୁଣିବାକୁ ମିଳିଥାଏ ଭଗବାନ ବିଷ୍ଣୁ କାର୍ତ୍ତିକ ପୂର୍ଣ୍ଣିମା ଦିନ ନିଜର ପ୍ରଥମ ଅବତାର ମତ୍ସ୍ୟ ଅବତାର ଧାରଣା କରିଥିଲେ ,ପୁରାଣ ଶାସ୍ତ୍ର ଅନୁସାରେ କାର୍ତିକ ପୂର୍ଣ୍ଣିମା ଦିନ ଭଗବାନ ଶିବ ପରାକ୍ରମୀ ରାକ୍ଷସ ତ୍ରିପୁରା ସୁରକୁ ସଂହାର କରିଥିଲେ l ଏହି କାରଣରୁ ଉଭୟ ବିଷ୍ଣୁ ଓ ଶିବ ଭକ୍ତଙ୍କ ପାଇଁ କାର୍ତ୍ତିକ ପୂର୍ଣ୍ଣିମାର ମହତ୍ୱ ରହିଛି l ଆହୁରି ମଧ୍ୟ କୁହାଯାଏ ଯେ ଏହି ଦିନ ବ୍ରହ୍ମା ,ବିଷ୍ଣୁ ,ମହେଶ୍ୱର ,ଅଙ୍ଗିରା ଓ ଆଦିତ୍ୟଙ୍କ ଭଳି ଦେବତା ମାନଙ୍କ ପାଇଁ ପାଳନ କରାଯାଇଥାଏ l କାର୍ତ୍ତିକ ପୂର୍ଣ୍ଣିମାର ପୂର୍ବ ପାଞ୍ଚ ଦିନକୁ ପଞ୍ଚୁକ ଭାବରେ ପାଳିତ ଭାବରେ ପାଳିତ ହୁଏ l ଆମ ଓଡ଼ିଆ ଘରେ ମଧ୍ୟ ଏହି ମାସର ବିଶେଷ ମହତ୍ୱ ରହିଛି l

ଓଡ଼ିଆ ଘରେ ମାସସାରା ତୁଳସୀ ଚଉଁରାର ବିଶେଷ ପୂଜା କରାଯାଇଥାଏ l ଘରେ ଘରେ ଆମିଷ ପରିତ୍ୟାଗ କରାଯାଏ ,ଏହା ଏକ ଧର୍ମର ମାସ ହୋଇଥିବାରୁ ସମସ୍ତେ ଏହାକୁ ଭଗବାନଙ୍କ ପ୍ରତି ନିଜର ସ୍ନେହ ଓ ଭକ୍ତି ଦେଖାଇ ଶ୍ରଦ୍ଧାର ସହ ପୂଜା କରନ୍ତି l ପଞ୍ଚୁକ ପାଞ୍ଚଦିନ ମଧ୍ୟ ଓଡ଼ିଆ ଘରେ ବିଶେଷ ମହତ୍ୱ ରହିଛି l ପୁରାଣରେ ଉଲେଖ ରହିଛି ଏହା ଗୋଟିଏ ଧର୍ମର ମାସ ହୋଇଥିବା କାରଣରୁ ସାରା ଓଡିଶା ବାସୀ ଏହି ମାସଟିକୁ ଖୁସି ଓ ଉଲ୍ଲାସର ସହିତ ପାଳନ କରନ୍ତି l ଗଙ୍ଗା ସ୍ନାନର ବିଶେଷ ମହତ୍ୱ କାର୍ତିକ ପୂର୍ଣ୍ଣମୀ ଦିନ ରହିଛି l ପୁରାଣରେ ଉଲେଖ ରହିଛିଯେ ଏହି ଦିନ ଧର୍ମ ,ଅର୍ଥ,କାମ ଓ ମୋକ୍ଷ ଭଳି ଚାରିଟି ପୁରୁଷାର୍ଥକୁ ଦାନ ଦେଉଥିବା ଦିନ ଭାବରେ ଗ୍ରହଣ କରାଯାଏ l

ହିନ୍ଦୁ ଧର୍ମର ଶାସ୍ତ୍ରରେ ମଧ୍ୟ କୁହl ଯାଇଛି ଯେ ଭରଣୀ ନକ୍ଷତ୍ରରେ ଗଙ୍ଗା ସ୍ନାନ ଓ ପୂଜନ କରିବା ଦ୍ୱାରା ସମସ୍ତ ଐଶର୍ଯ୍ୟ ଓ ସୁଖ ସୁବିଧା ପ୍ରାପ୍ତ ହୋଇଥାଏ l ଦୀପାବଳି ଅମାବାସ୍ୟାର ୧୫ ଦିନ ପରେ କାର୍ତିକ ପୂର୍ଣ୍ଣିମା ପଡିଥାଏ l ଲୋକମାନଙ୍କର ଆସ୍ଥା ରହିଛି ଯଦି ଏହିଦିନ ଈଶ୍ୱରଙ୍କର ଆରାଧନା କରାଯାଏ ତେବେ ନିଜ ଭିତରେ ଥିବା ସମସ୍ତ ତାମସିକ ପ୍ରବୃତି ଦୁରେଇ ଯାଇଥାଏ lଚଳିତ ବର୍ଷ କାର୍ତ୍ତିକ ମାସରେ ପଞ୍ଚୁକ ୬ ଦିନ ପଡିଛି l ଏହି ମାସରେ ୨୫ ବର୍ଷ ପରେ ଆମ ବଡ଼ ଠାକୁର କାଳିଆ ଠାକୁରଙ୍କ ନାଗାର୍ଜୁନ ବେଶ ପଡି ଥିଲା l ଏହି ଅପୂର୍ବ ସଂଯୋଗ ୨୫ ବର୍ଷ ପରେ ଦେଖା ଦେଇଥିଲେ ମଧ୍ୟ ତାଙ୍କର ଭକ୍ତ ମାନେ ତାଙ୍କ ସେହି ମନମୋହକ ରୁପକୁ ଦେଖିବାରୁ ବଞ୍ଚିତ ହୋଇଛନ୍ତି l ଲାଗୁଛି ସତେକି ପ୍ରଭୁ ଏହି ନାଗାର୍ଜୁନ ବେଶ ପରେ କରୋନା ରାକ୍ଷସକୁ ଆମ ଧରା ପୃଷ୍ଠାରୁ ଦୁରେଇ ଦେବେ l

ପୁରୁଣା କାଳର ପରମ୍ପରା ଥିଲା କାର୍ତିକ ପୂର୍ଣ୍ଣିମା ଦିନ ଡଙ୍ଗା ଭଷା ଯାଇଥାଏ ଏଥିପାଇଁ କାରଣ ଓଡ଼ିଆ ପୁଅ ବୋଇତ ମେଲାଇ ସାତ ଦରିଆ ପରି ଯାଇଥାଏ ବ୍ୟାପାର ବଣିଜ କରିବା ପାଇଁ l ତେଣୁ ସେହି ସମୟରୁ ରହି ଆସିଛି କାର୍ତ୍ତିକ ପୁର୍ଣିମାର ମହତ୍ୱ l ଯେତେବେଳେ ଓଡ଼ିଆ ପୁଅ ବଣିଜ କରିବାକୁ ଯାଏ ସେତେବେଳେ ତାକୁ ଓଡ଼ିଆ ବୋହୁ ମାନେ ବନ୍ଦାପନା କରି ବିଦାୟ ଦେଇ ଥାନ୍ତି l ସେତେବେଳେ ସେ ଫେରିବା ବେଳକୁ କେତେଯେ ଧନ ସମ୍ପଦ ନେଇ ନିଜ ସହିତ ଫେରିଥାଏ l କିନ୍ତୁ ଆଜି ଆଉ ସେ ସମୟ ନାହିଁ l ସେହି ସମୟର ଏହି ସଂକୃତି ଆଜି ମଧ୍ୟ ଓଡିଶା ମାଟିରେ ବଞ୍ଚି ରହିଥିଲେ ସୁଦ୍ଧା ତାହାକୁ ଗୋଟିଏ ପର୍ବ ଭାବରେ କେବଳ ପାଳନ କରାଯାଉଛି l ସେତେବେଳର ସମୟ ଓ ଏବେକାର ସମୟ ମଧ୍ୟରେ ଅନେକ ଫରକ ଆସି ଯାଇଛି l ଓଡ଼ିଆ ପୁଅ ବିଦେଶ ଯାଉଛି ସତ କିନ୍ତୁ ଆଉ ଫେରୁନାହିଁ l

ପୁରୁଣା ସମୟକୁ ମାନେ ପକାଇ ଆଜିର ସମାଜ କିଛିଟା ଶିକ୍ଷା କରିଛି l ସମସ୍ତେ ଏବେ ପରଦେଶୀ ହୋଇ ଗଲେଣି l କେବଳ ନିଜର କର୍ମମୟ ଜଞ୍ଜାଳ ଭିତରେ ଜୀବନ ଓ ଜୀବିକା ପାଇଁ ସଂଘର୍ଷ ଚଳାଇଛନ୍ତି l ଆଗରୁ ଆମେ ଜେଜେମା ଦାଦା ଓ ଖୁଡିଙ୍କ ସହିତ ସମସ୍ତ ପର୍ବ ପର୍ବାଣି ପାଳନ କରୁଥିଲୁ ,କିନ୍ତୁ ବର୍ତ୍ତମାନ ଆଉ ସେ ଯୌଥ ପରିବାର ଦେଖିବାକୁ ମିଳୁନାହିଁ l ସମସ୍ତେ ନିଜନିଜ ଧନ୍ଦାରେ ରହି ନିଜନିଜ ସ୍ଥାନରେ ସମସ୍ତ ପର୍ବ ପର୍ବାଣି ପାଳନ କରୁଛନ୍ତି l ଆମର ସଂସ୍କୃତି ସେହି ପୁରୁଣା ଦିନକୁ ଝୁରୁଛି ହେଲେ ଆଉ ସେ ପୁରୁଣା ଦିନ ଭଳି ଗହଳ ଚହଳ ନାହିଁ l ଗାଁ ଗହଳିର ସେତବେଳର ମଜା ଥିଲା ନିୟର କିନ୍ତୁ ଏବେ ତାହା ଧୀରେ ଧୀରେ ଫିକା ପଡ଼ିବାକୁ ଲାଗିଛି l ସମୟର ସୁଅରେ କାର୍ତ୍ତିକ ପୂର୍ଣ୍ଣମୀର ପରମ୍ପରା ମଧ୍ୟ ଭାସି ଯିବାକୁ ବସିଲାଣି l ଚଳିତ ବର୍ଷର ଏହି କରୋନା ମହାମାରୀ ସବୁ ପର୍ବ ପର୍ବାଣିକୁ ଫିକା ପକାଇଲା ଭଳି କାର୍ତ୍ତିକ ପୂର୍ଣ୍ଣମୀ ମଧ୍ୟ ଫିକା ପଡିଯାଇଛି l

Tags
Show More

Related Articles

Back to top button
Close