ଜାପାନର ଏକ ରିସର୍ଚ୍ଚରେ ଏକ ବଡ଼ ଖୁଲାସା କରିଛନ୍ତି ଅନୁସନ୍ଧାନକାରୀ। ରିସର୍ଚ୍ଚ ଅନୁସାରେ ମେଘରେ ମିଳିଛି ମାଇକ୍ରୋପ୍ଲାଷ୍ଟିକ୍। ଗବେଷକମାନେ ବିଶ୍ୱାସ କରନ୍ତି ଯେ, ଏହା ସାମୁଦ୍ରିକ ପରିବେଶ ଏବଂ ଜଳବାୟୁ ପରିବର୍ତ୍ତନ ଉପରେ ଗମ୍ଭୀର ପ୍ରଭାବ ପକାଇପାରେ । ସେମାନଙ୍କ କହିବା ଅନୁଯାଇ ଏହା ଏକ ବଡ ଚେତାବନୀ । ଏହାସହ ପ୍ଲାଷ୍ଟିକ ସମ୍ବନ୍ଧରେ ତୁରନ୍ତ କଡା ପଦକ୍ଷେପ ନେବାକୁ ପଡିବ ନଚେତ୍ ଭବିଷ୍ୟତରେ ଏହାକୁ ବନ୍ଦ କରାଯାଇପାରିବ ନାହିଁ । ଏହା ମାନବ ଶରୀର ଏବଂ ପରିବେଶ ପାଇଁ ଏକ ବଡ଼ ବିପଦ ହୋଇପାରେ । ୱାସେଦା ବିଶ୍ୱବିଦ୍ୟାଳୟର ପ୍ରଫେସର ହିରୋସି ଓକୋଚି ଏବଂ ଅନ୍ୟମାନଙ୍କ ନେତୃତ୍ୱରେ ଅନୁସନ୍ଧାନକାରୀ ଦଳ ବାଦଲରୁ ସଂଗୃହିତ ପାଣିର ୪୪ ଟି ନମୁନା ଯାଞ୍ଚ କରିଥିଲେ । ଅନୁସନ୍ଧାନରୁ ଜାଣିବାକୁ ପାଇଲେ ଯେ, ପାଣିରେ ଅତି କମରେ ୭୦ ଟି ମାଇକ୍ରୋପ୍ଲାଷ୍ଟିକ୍ ଥିଲା । କାନାଗାୱା ଜିଲ୍ଲାର ୟୋକୋହାମାର ପଶ୍ଚିମ, ଫୁଜି ପର୍ବତର ଶିଖର ଏବଂ ପାଦଦେଶରେ ଏବଂ ତାନଜାଭା-ଓୟାମା ପର୍ବତରୁ ଏହା ଜମା କରାଯାଇଥିଲା । ଏହି ଦଳ ସେମାନଙ୍କ ଅନୁସନ୍ଧାନ କାଗଜରେ ଲେଖିଛନ୍ତି ଯେ ଆମର ଜ୍ଞାନ ଅନୁଯାୟୀ, ବାଦଲ ପାଣିରେ ବାୟୁଜନିତ ମାଇକ୍ରୋପ୍ଲାଷ୍ଟିକ୍ ଉପରେ ଏହା ହେଉଛି ପ୍ରଥମ ରିପୋର୍ଟ ।
ଜଳବାୟୁରେ ଗୁରୁତର କ୍ଷତି ହେବାର ଆଶଙ୍କା :-
ଯଦି ବାଦଲରେ ସେମାନଙ୍କର ଉପସ୍ଥିତି ସମନ୍ୱିତ ପ୍ରୟାସ ଦ୍ୱାରା ନିୟନ୍ତ୍ରିତ ନହୁଏ, ତେବେ ମାଇକ୍ରୋପ୍ଲାଷ୍ଟିକ୍ ଜଳବାୟୁ ଏବଂ ମାନବ ଶରୀର ପାଇଁ ଗୁରୁତର କ୍ଷତି ଘଟାଇପାରେ ବୋଲି ଅନୁସନ୍ଧାନକାରୀ ମାନେ କହିଛନ୍ତି । ୱାସେଦା ବିଶ୍ୱବିଦ୍ୟାଳୟର ଅଗ୍ରଣୀ ଲେଖକ ହିରୋସି ଓକୋଚି କହିଛନ୍ତି ଯେ, ଯଦି ‘ପ୍ଲାଷ୍ଟିକ ବାୟୁ ପ୍ରଦୂଷଣ’ ପ୍ରସଙ୍ଗକୁ ସକ୍ରିୟ ଭାବେ ସମାଧାନ କରା ନ ଯାଏ, ତେବେ ଜଳବାୟୁ ପରିବର୍ତ୍ତନ ଏବଂ ପରିବେଶ ବିପଦ ଏକ ବାସ୍ତବିକତାରେ ପରିଣତ ହୋଇପାରେ। ଯାହା ଭବିଷ୍ୟତରେ ଅପୂରଣୀୟ ତଥା ଗୁରୁତର ପରିବେଶ କ୍ଷତି ଘଟାଇପାରେ । ଯେବେ ମେଘ ଉଚ୍ଚତାରେ ସୂର୍ଯ୍ୟକିରଣ ଏବଂ ଅଲ୍ଟ୍ରାଟୋଇଲେଟ୍ ବିକିରଣର ସମ୍ମୁଖୀନ ହୁଏ, ସେବେ ମାଇକ୍ରୋପ୍ଲାଷ୍ଟିକ୍ ଗ୍ରୀନ୍ ହାଉସ୍ ଗ୍ୟାସ୍ ପାଇଁ ଯୋଗଦାନ ଦେଇପାରେ ବୋଲି ସେ କହିଛନ୍ତି । ତେବେ ମାଇକ୍ରୋପ୍ଲାଷ୍ଟିକ୍ ହେଉଛି ପ୍ରକୃତରେ ଏକ ପ୍ଲାଷ୍ଟିକ୍ କଣିକା। ଯାହାର ଆକାର ହେଉଛି ୫ ମିଲିମିଟରରୁ କମ୍ । ସେଗୁଡିକ ବିଭିନ୍ନ ଉତ୍ସରୁ ଉତ୍ପାଦିତ ହୋଇଥାଏ। ଯେପରିକି- ଶିଳ୍ପ ବର୍ଜ୍ୟବସ୍ତୁ, ବସ୍ତ୍ର, ସିନ୍ଥେଟିକ୍ କାର୍ ଟାୟାର ଇତ୍ୟାଦି । ଏହି ସୁକ୍ଷ୍ମ କଣିକା ସମୁଦ୍ରର ଗଭୀରତମ ଅଂଶରେ ଥିବା ମାଛ ଭିତରେ, ଆର୍କଟିକ୍ ସମୁଦ୍ର ବରଫରେ ବିସ୍ତୃତ ହୋଇଥିବାର ଦେଖିବାକୁ ମିଳିଛି । ତେବେ ମାଇକ୍ରୋପ୍ଲାଷ୍ଟିକ୍ ଉପରେ ବହୁତ କମ୍ ଗବେଷଣା କରାଯାଇଛି ଏବଂ ଏହା କିପରି ମେଘରେ ପହଞ୍ଚେ ସେ ବିଷୟରେ ଅଳ୍ପ ସୂଚନା ମିଳିଛି ।
