ପିଲାମାନଙ୍କ ଭବିଷ୍ୟତକୁ ଦୃଷ୍ଟିରେ ରଖି ୪ ହଜାର ପିଲାଙ୍କ ନିକଟକୁ ପ୍ରଧାନମନ୍ତ୍ରୀଙ୍କ ଚିଠି
ନୂଆଦିଲ୍ଲୀ: ପିଲାମାନଙ୍କ ପାଇଁ କେନ୍ଦ୍ର ସରକାର କରିଥିବା ‘ପିଏମ୍ କେୟାର୍ସ’କୁ ବର୍ଣ୍ଣନା କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୪୦୦୦ ପିଲାଙ୍କ ନିକଟକୁ ଚିଠି ଲେଖିଛନ୍ତି। ପିଲାମାନଙ୍କ ଭବିଷ୍ୟତକୁ ଦୃଷ୍ଟିରେ ରଖି ପ୍ରଧାନମନ୍ତ୍ରୀଙ୍କର ଏହି ଯୋଜନା ବିଷୟରେ ବୁଝାଇ ମୋଦି ସୋମବାର ୪ ହଜାରରୁ ଅଧିକ ପିଲାଙ୍କୁ ଜଣ ଜଣ କରି ଚିଠି ପଠାଇଛନ୍ତି। ମହାମାରୀ କରୋନା ସମୟରେ ନିଜ ବାପାମାଆଙ୍କୁ ହରାଇଥିବା ପିଲାମାନଙ୍କର ଉନ୍ନତି ସକାଶେ ଏହି ଯୋଜନା କାମ କରିବ। ଏହା ଜରିଆରେ ପିଲାମାନେ ନିଜର ଭବିଷ୍ୟତ ଗଢିପାରିବେ ।ପ୍ରଧାନମନ୍ତ୍ରୀ ମୋଦୀଙ୍କର ଏହି ଚିଠିକୁ ମହିଳା ଓ ଶିଶୁ ବିକାଶ ମନ୍ତ୍ରାଳୟ ଦ୍ବାରା ବିଭିନ୍ନ ଆଡକୁ ପଠାଯାଇଛି। ମୋଦୀଙ୍କ କହିବା କଥା ହେଉଛି ଦେଶର ପିଲାମାନଙ୍କ ସ୍ବର୍ଣ୍ଣିମ ଭବିଷ୍ୟତ ଗଠନ ଉଦ୍ଦେଶ୍ୟରେ ଏହି ‘ପିଏମ୍ କେୟାର୍ସ’ ଯୋଜନାକୁ ଆରମ୍ଭ କରାଯାଇଛି। ଏହି ଯୋଜନା ତମକୁ ସ୍ୱପ୍ନ ଦେଖିବାର ସୁଯୋଗ ଦେବ। ତମ ସ୍ୱପ୍ନକୁ ଶାକାର କରିବା ପାଇଁ କେବେ ବି କୌଣସି ସାହାଯ୍ୟର ଅଭାବ ଅନୁଭବ ହେବ ନାହିଁ ବୋଲି ମୋଦି ଏହି ଚିଠିରେ କହିଛନ୍ତି। ଏହି ଚିଠିରେ ମୋଦୀ ତାଙ୍କ ପିଲାଦିନର କିଛି କଥାକୁ ମଧ୍ୟ ପିଲାମାନଙ୍କ ସହ ବାଣ୍ଟିଛନ୍ତି। ସେ କହିଛନ୍ତି ଯେ ୧୦୦ ବର୍ଷ ତଳେ ତାଙ୍କ ପରିବାର ବି ଏହି ସମାନ ଦୁଃଖ ଦେଇ ଗତି କରିଥିଲା। ସେ ଆହୁରି ବି କହିଛନ୍ତି ଯେ ବାପାମାଆଙ୍କ ଉପସ୍ଥିତି ପିଲା ପାଇଁ ସବୁଠାରୁ ବଡ଼ ସମର୍ଥନ।