କୋଲକାତାରେ ଆଉ ପ୍ରଚାର କରିବେ ନାହିଁ ମମତା ବାନାର୍ଜୀ

ଦେଶରେ କରୋନା ମାମଲା ଦ୍ରୁତ ଗତିରେ ବଢୁଥିବା ବେଳେ ପଶ୍ଚିମବଙ୍ଗ ବିଧାନସଭା ନିର୍ବାଚନ ଉପରେ ମଧ୍ୟ ଏହା ପ୍ରଭାବ ପକାଇବା ଆରମ୍ଭ କରିଛି। କଂଗ୍ରେସ ନେତା ରାହୁଲ ଗାନ୍ଧୀଙ୍କ ପରେ ଏବେ ଟିଏମସି ମୁଖ୍ୟ ତଥା ମୁଖ୍ୟମନ୍ତ୍ରୀ ମମତା ବାନାର୍ଜୀ ମଧ୍ୟ ନିର୍ବାଚନ ରାଲି ସମ୍ପର୍କରେ ଏକ ବଡ଼ ଘୋଷଣା କରିଛନ୍ତି। ଅବଶିଷ୍ଟ ପର୍ଯ୍ୟାୟ ପାଇଁ ସେ କୋଲକତାରେ ପ୍ରଚାର କରିବେ ନାହିଁ ବୋଲି ସେ କହିଛନ୍ତି। ଟିଏମସି ଏମ୍‌ପି ଡେରେକ ଓ’ବ୍ରାଇନ ଟୁଇଟ୍‌ କରି ଏହି ସୂଚନା ଦେଇଛନ୍ତି। ଡେରେକ ଓ’ବ୍ରାଇନ ଏକ ଟୁଇଟ୍‌ରେ କହିଛନ୍ତି ଯେ ପଶ୍ଚିମବଙ୍ଗ ନିର୍ବାଚନ ମଧ୍ୟରେ ରାଜ୍ୟରେ କରୋନା ସଂକ୍ରମଣ ବଢୁଥିବାରୁ ମମତା ବାନାର୍ଜୀ ଆଉ କୋଲକାତାରେ ପ୍ରଚାର କରିବେ ନାହିଁ। ବାକି ସବୁ ଜିଲାରେ ସେ ନିର୍ବାଚନ ରାଲିର ସମୟକୁ କମାଇ ଦେଇଛନ୍ତି। ମାତ୍ର ୩୦ ମିନିଟ ମଧ୍ୟରେ ସେ ରାଲି ଶେଷ କରିବେ।

ସୂଚନାଯୋଗ୍ୟ ଯେ, ମମତା ବାନାର୍ଜୀ ପୂର୍ବରୁ ନିର୍ବାଚନ ଆୟୋଗଙ୍କ ଠାରେ ଦାବି କରିଥିଲେ ଯେ, ପଶ୍ଚିମବଙ୍ଗର ଅବଶିଷ୍ଟ ପର୍ଯ୍ୟାୟ ପାଇଁ ନିର୍ବାଚନ ଏକାସାଙ୍ଗରେ କରାଯାଉ। ଏଥି ସହିତ କଂଗ୍ରେସ ନେତା ରାହୁଲ ଗାନ୍ଧୀ ପଶ୍ଚିମବଙ୍ଗରେ ତାଙ୍କର ସମସ୍ତ ର୍ନିବାଚନ ସମାବେଶକୁ ବାତିଲ କରିବାକୁ ନିଷ୍ପତ୍ତି ନେଇସାରିଛନ୍ତି।