ନୂଆଦିଲ୍ଲୀ: କଂଗ୍ରେସର ଦଳର ନେତୃତ୍ୱ ନାଟକରେ ପଡ଼ିଲା ଯବନିକା । ଆଗାମୀ ଛଅ ମାସ ଯାଏଁ ସୋନିଆ ଗାନ୍ଧି କଂଗ୍ରେସର ଅନ୍ତରୀଣ ଅଧ୍ୟକ୍ଷ ଭାବେ ଦାୟିତ୍ୱ ତୁଲାଇବେ। ଦଳର ଦୈନନ୍ଦିନ କାର୍ଯ୍ୟ କରିବାକୁ ଏକ କମିଟି ଗଠନ କରାଯିବ । ଦୀର୍ଘ ସାତ ଘଣ୍ଟା ଧରି କଂଗ୍ରେସ ୱାର୍କିଙ୍ଗ୍ କମିଟି ବୈଠକ ବସିଥିଲା। ଏହାକୁ ନେଇ ସୋନିଆ କହିଥିଲେ, କଂଗ୍ରେସ ଏକ ବଡ଼ ପରିବାର ଓ କାହା ମନରେ ଏହାକୁ ନେଇ କୌଣସି ମନ୍ତାନ୍ତର ରହିବା ଆବଶ୍ୟକ ନାହିଁ ଽ ଆଗାମୀ ଛଅ ମାସ ପରେ ‘ଅଲ୍ ଇଣ୍ଡିଆ କଂଗ୍ରେସ କମିଟି’ରେ ଭବିଷ୍ୟତର କାର୍ଯ୍ୟପନ୍ଥା ନିର୍ଦ୍ଧାରଣ କରାଯିବ।
ସୂଚନାଯୋଗ୍ୟ ଯେ, ଦଳର ଅଭ୍ୟନ୍ତରୀଣ ବ୍ୟବସ୍ଥାକୁ ପୂର୍ଣ୍ଣରୂପେ ଯାଞ୍ଚ କରିବାକୁ ଅନୁରୋଧ କରି କଂଗ୍ରେସର ୨୩ଜଣ ନେତା ସୋନିଆ ଗାନ୍ଧୀଙ୍କୁ ଲେଖିଥିଲେ । ଯାହାକୁ ନେଇ ଆଜି ବୈଠକରେ ଜୋରଦାର ବିରୋଧ ଦେଖିବାକୁ ମିଳିଥିଲା । ବୈଠକରେ ସୋନିଆ ଦଳର ପରବର୍ତ୍ତୀ ଅଧ୍ୟକ୍ଷ ନିର୍ବାଚନ ପ୍ରକ୍ରିୟା ଆରମ୍ଭ କରିବାକୁ ‘ସିଡବ୍ଲୁସି’ ସଦସ୍ୟମାନଙ୍କୁ କହିଥିଲେ। କିନ୍ତୁ, ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂହଙ୍କ ସମେତ ଅନେକ ନେତା ସୋନିଆଙ୍କୁ କଂଗ୍ରେସ ଅଧ୍ୟକ୍ଷା ଭାବେ ରହିବାକୁ ଅନୁରୋଧ କରିଥିଲେ।
