ଆଜି ଶେଷ ହେବ ପୌର ନିର୍ବାଚନ ପ୍ରାର୍ଥିପତ୍ର ଦାଖଲ

ଆଜି ସରିବ ପୌର ନିର୍ବାଚନ ପ୍ରାର୍ଥିପତ୍ର ଦାଖଲ । କିନ୍ତୁ ଏଯାଏ ପ୍ରମୁଖ ୩ ଦଳ ସବୁ ସ୍ଥାନରେ ସେମାନଙ୍କ ପ୍ରାର୍ଥୀଙ୍କ ନାଁ ଘୋଷଣା କରିନାହାନ୍ତି । ତେବେ ଶାସକ ବିଜେଡି ସମେତ ବିରୋଧୀ ବିଜେପି ଓ କଂଗ୍ରେସ ନିଜ ନିଜର ସମ୍ପୂର୍ଣ୍ଣ ପ୍ରାର୍ଥୀ ତାଲିକା ଜାରି କରିନାହାନ୍ତି । ଫଳରେ ବିନା ଟିକେଟରେ ଅନେକ ଆଶାୟୀ ସ୍ବାଧୀନ ଭାବେ ପ୍ରାର୍ଥିପତ୍ର ଦାଖଲ କରିଦେଇଛନ୍ତି। କିନ୍ତୁ ସେମାନଙ୍କ ଶୋଭାଯାତ୍ରାରେ ଦଳୀୟ ପତାକା ଲାଗୁଛି ଓ ଦଳୀୟ କର୍ମୀ ସେଥିରେ ସାମିଲ ହେଉଛନ୍ତି। ୩ ମହାନଗର ପାଇଁ ୩ ପ୍ରମୁଖ ଦଳ ସେମାନଙ୍କ ପ୍ରାର୍ଥୀ ଚୂଡାନ୍ତ କରିସାରିଛନ୍ତି ।

ସେମାନଙ୍କ ମଧ୍ୟରୁ ଅଧିକାଂଶ ପ୍ରାର୍ଥୀ ଆଜି ଶେଷେ ଦିନରେ ନାମାଙ୍କନ ଭରିବେ । ସେହିପରି ଭୁବନେଶ୍ବର ପାଇଁ ଏଯାଏ ୧୩୦ ଜଣ କର୍ପୋରେଟର ପାଇଁ ନାମାଙ୍କନ ପତ୍ର ଦାଖଲ କରିଛନ୍ତି । ମେୟର ପଦ ପାଇଁ ୫ ଜଣ ପ୍ରାର୍ଥୀପତ୍ର ଦାଖଲ କରିଥିବା ବେଳେ ରବିବାର ଆଉ ୭ ଟି ଫର୍ମ ବିକ୍ରି ହୋଇଥିବା ଜଣାପଡିଛି । ସୋମବାର ପ୍ରାର୍ଥିପତ୍ର ଦାଖଲର ଶେଷ ତାରିଖ ହୋଇଥିଲେ ବି ପ୍ରାର୍ଥୀମାନେ ୯ ତାରିଖ ସୁଦ୍ଧା ଦଳୀୟ ଟିକେଟ୍ ଦାଖଲ କରିପାରିବେ। ଟିକେଟ୍ ଦାଖଲ ନ କଲେ ସେମାନଙ୍କୁ ସ୍ବାଧୀନ ପ୍ରାର୍ଥୀ ଭାବେ ବିବେଚନା କରାଯିବ। ଆଜି ପ୍ରାର୍ଥିପତ୍ର ଦାଖଲ ସରିବା ସହ ତିନି ଦଳର ପ୍ରାର୍ଥୀମାନଙ୍କ ନାମ ଘୋଷଣା ହେବ। ଏହା ପରେ ୱାର୍ଡ ସ୍ତରରେ ରାଜନୀତି ସରଗରମ ହେବ।