କରୋନା ମୁକାବିଲା ନେଇ ଆଜି ୮ଟି ରାଜ୍ୟର ମୁଖ୍ୟମନ୍ତ୍ରୀଙ୍କ ସହ କଥା ହେବେ ପ୍ରଧାନମନ୍ତ୍ରୀ

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ମଙ୍ଗଳବାର ଦିନ ଭିଡିଓ କନଫରେନ୍ସିଂ ମାଧ୍ୟମରେ ମୁଖ୍ୟମନ୍ତ୍ରୀ ତଥା ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳର ଅନ୍ୟ ପ୍ରତିନିଧୀଙ୍କ ସହ ଆଲୋଚନା କରି କୋଭିଡ -19 ର ସ୍ଥିତି ଏବଂ ଟିକା ବିତରଣ ରଣନୀତି ସମୀକ୍ଷା କରିବେ ବୋଲି ସୂଚନା ମିଳିଛି । ସୂଚନାନୁସାରେ, ପ୍ରଧାନମନ୍ତ୍ରୀ ମୋଦୀ କରୋନା ଦ୍ୱାରା ପ୍ରଭାବିତ ହୋଇଥିବା ଆଠଟି ରାଜ୍ୟ ସହିତ ଏହି ବୈଠକ କରିବେ । ଏବଂ ଦୃତଗତିରେ ବଢୁଥିବା କରୋନା ସଂକ୍ରମଣକୁ ନିୟନ୍ତ୍ରଣ କରିବା ନେଇ ରଣନୀତି ଉପରେ ଆଲୋଚନା କରିବେ ବୋଲି ଜଣାପଡିଛି । ଦ୍ୱିତୀୟ ବୈଠକରେ ସମସ୍ତ ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳକୁ ଟିକା କିଭଳି ସୁବ୍ୟବସ୍ଥିତ ଭାବରେ ବଣ୍ଟନ କରାଯିବ ସେ ନେଇ ମଧ୍ୟ ରଣନୀତି ଉପରେ ଆଲୋଚନା ହେବାର ସମ୍ଭାବନା ରହିଛି । ପ୍ରଧାନମନ୍ତ୍ରୀ ମୋଦୀ ବର୍ତ୍ତମାନ ପର୍ଯ୍ୟନ୍ତ ଅନେକ ଥର ରାଜ୍ୟମାନଙ୍କ ସହ ବୈଠକ କରି କରୋନା ସ୍ଥିତିର ସମୀକ୍ଷା କରିଛନ୍ତି । ଗତ କିଛି ଦିନ ହେବ ସାରା ଦେଶରେ କରୋନାଭାଇରସ୍ ସଂକ୍ରମଣ ମାମଲା 50,000 ରୁ କମ୍ ଥିବାବେଳେ କେତେକ ରାଜ୍ୟରେ ଏହା ଦ୍ରୁତ ଗତିରେ ବୃଦ୍ଧି ପାଇଛି । କେତେକ ସହରରେ ନାଇଟ୍ କର୍ଫ୍ୟୁ ମଧ୍ୟ ଲାଗୁ କରାଯାଇଛି । କେନ୍ଦ୍ର ଦ୍ୱାରା ନିରନ୍ତର ପ୍ରୟାସ ମଧ୍ୟ କରାଯାଉଛି ଯେ ଯେତେବେଳେ ବି କରୋନା ଟିକା ଉପଲବ୍ଧ ହେବ, ଏହାର ସୁଗମ ବଣ୍ଟନ ପାଇଁ ବ୍ୟବସ୍ଥା କରାଯାଇପାରିବ | ବର୍ତ୍ତମାନ ଭାରତରେ ପାଞ୍ଚଟି ଟିକା ପ୍ରସ୍ତୁତି ଆଡକୁ ଗତି କରୁଛି। ଏଥି ମଧ୍ୟରୁ ଚାରିଟି ଦ୍ୱିତୀୟ କିମ୍ବା ତୃତୀୟ ପର୍ଯ୍ୟାୟରେ ଥିବାବେଳେ ଗୋଟିଏ ପ୍ରଥମ କିମ୍ବା ଦ୍ୱିତୀୟ ପର୍ଯ୍ୟାୟରେ ରହିଛି |

ଅନେକ ରାଜ୍ୟରେ ବର୍ତ୍ତମାନ ପୁଣି ଥରେ ନୂତନ ମାମଲା ସାମ୍ନାକୁ ଆସୁଛି । ମହାରାଷ୍ଟ୍ର, କେରଳ, କର୍ଣ୍ଣାଟକ, ତାମିଲନାଡୁ, ତେଲେଙ୍ଗାନା, ପଞ୍ଜାବ, ହରିୟାଣା ସମେତ ଦେଶର ଅନେକ ରାଜ୍ୟରେ ରବିବାର ଦିନ କୋଭିଡ -19 ର ନୂଆ ମାମଲା ରିପୋର୍ଟ ହୋଇଛି ଏବଂ ଅଧିକ ରୋଗୀ ଅସୁସ୍ଥତା ହେତୁ ମୃତ୍ୟୁ ବରଣ କରିଛନ୍ତି। ବିଭିନ୍ନ ରାଜ୍ୟର ସ୍ୱାସ୍ଥ୍ୟ ବିଭାଗ ଏହି ସୂଚନା ଦେଇଛନ୍ତି। ରବିବାର ଦିନ ମହାରାଷ୍ଟ୍ରରେ 5,753 ଜଣ ନୂତନ କରୋନା ସଂକ୍ରମଣ ରୋଗୀ ଚିହ୍ନଟ ହେବା ପରେ ମୋଟ ସଂକ୍ରମିତ ଲୋକଙ୍କ ସଂଖ୍ୟା 17,80,208 କୁ ବୃଦ୍ଧି ପାଇଥିବାବେଳେ 50 ରୋଗୀଙ୍କ ମୃତ୍ୟୁ ପରେ ମୋଟ ମୃତକଙ୍କ ସଂଖ୍ୟା 46,623 କୁ ବୃଦ୍ଧି ପାଇଛି ।