ଚଣ୍ଡିଗଡ: ପୁଲିସ ହେପାଜତରୁ ଚମ୍ପଟ ମାରିଲା ପଞ୍ଜାବୀ ଗାୟକ ସିଦ୍ଧୁ ମୁସେୱାଲାଙ୍କ ହତ୍ୟାକାରୀ । ମୁସେୱଲାଙ୍କା ହତ୍ୟା ଅଭିଯୋଗରେ ଗିରଫ ହୋଇଥିବା ଶୁଟର୍ ଦୀପକ ଓରଫ୍ ଟିନୁ ଜେଲ୍ରୁ ଫେରାର ହୋଇଯାଇଛି। ଏହାପରେ ପୁଲିସ ବିଭାଗରେ ହଇଚଇ ସୃଷ୍ଟି ହୋଇଯାଇଛି। ଶନିବାର ସେଣ୍ଟ୍ରାଲ ଇନ୍ଭେଷ୍ଟିକେସନ ଏଜେନ୍ସି(ସିଆଇଏ)ର ଅଧିକାରୀ ହତ୍ୟାକାରୀ ଦୀପକ ଓରଫ ଟିନୁକୁ ବିଳମ୍ବିତ ରାତିରେ ଅନ୍ୟତ୍ର ନେଇଯାଉଥିବା ବେଳେ ସେ ଖସି ପଳାଇଥିବା ସୂଚନାମିଳିଛି। ଘଟଣାଟି କୌଣସି ଫିଲ୍ମର କାହାଣୀ ଭଳି ଲାଗୁଥିଲେ ବି ସତ। ତେବେ ଟିନୁକୁ ଖସାଇ ଦିଆଯାଇଛି ନା ସତକୁ ସତ ସେ ଖସି ପଳେଇଛି ସେ ନେଇ ପ୍ରଶ୍ନ ଉଠିଛି। ସୂଚନା ଅନୁସାରେ, ସିଦ୍ଧୁ ମୁସେୱାଲା ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ଗେଙ୍ଗଷ୍ଟାର ଲରେନ୍ସ ବିଷ୍ଣୋଇ ଗ୍ୟାଙ୍ଗର ସାର୍ପ ଶୁଟର୍ ଥିଲା ଦୀପକ। ସେ ଗତ ରାତି ୩ଟା ବେଳେ ମନସା ପୁଲିସ ହେପାଜତରୁ ଫେରାର ହୋଇଯାଇଛି। ସୂଚନା ଅନୁଯାୟୀ ମନସା ସିଆଇଏ ଷ୍ଟାଫ୍ର ଟିମ୍ ରିମାଣ୍ଡରେ ଟିନୁକୁ କପୁରଥଲା ଜେଲକୁ ନେଉଥିଲେ। ଏହି ସମୟରେ ସେ ପୁଲିସକୁ ଚକମା ଦେଇ ଫେରାର ହୋଇଯାଇଛି। ସିଦ୍ଧୁ ମୁସେୱାଲା ହତ୍ୟାକାଣ୍ଡରେ ଦାଖଲ ହୋଇଥିବା ଚାର୍ଜସିଟ୍ର ୧୫ ଜଣିଆ ଅପରାଧିଙ୍କ ତାଲିକାରେ ଦୀପକର ନାଁ ବି ରହିଛି। ମେ ୨୯ ତାରିଖରେ ପଞ୍ଜାବର ଲୋକପ୍ରିୟ ଗାୟକ ସିଦ୍ଧୁ ମୁସେୱାଲାଙ୍କ ହତ୍ୟା ହୋଇଥିଲା।
