ଘୋଷଣା ହେଲା ଭାରତ- ଅଷ୍ଟ୍ରେଲିଆ ସିରିଜର କାର୍ଯ୍ୟସୂଚୀ, ଜାଣନ୍ତୁ କେବେ କେଉଁଠି ଖେଳାଯିବ ମ୍ୟାଚ୍

କ୍ରିକେଟ୍ ଅଷ୍ଟ୍ରେଲିଆ ନଭେମ୍ବରରେ ଭାରତ ବିପକ୍ଷରେ ଖେଳିବାକୁ ଥିବା ଦିନିକିଆ, ଟି ଟ୍ୱେଣ୍ଟି ଓ ଟେଷ୍ଟ ସିରିଜର କାର୍ଯ୍ୟସୂଚୀ ଘୋଷଣା କରିଛି । ଆଡିଲେଡ୍ ଓଭାଲ୍ ଗ୍ରାଉଣ୍ଡରେ ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଦିବରାତ୍ର ଟେଷ୍ଟ ମ୍ୟାଚ୍ ଖେଳାଯିବ | ଭାରତୀୟ ଦଳର ଅଷ୍ଟ୍ରେଲିଆ ଗସ୍ତ ନଭେମ୍ବର 27 ରେ ଦିନିକିଆ ରୁ ଆରମ୍ଭ ହୋଇଥିବାବେଳେ ଜାନୁୟାରୀ 19ରେ ଦଳ ଶେଷ ଟେଷ୍ଟ ମ୍ୟାଚ ଖେଳି ଅଷ୍ଟ୍ରେଲିଆ ଗସ୍ତ ଶେଷ କରିବ ।

ଟିମ୍ ଇଣ୍ଡିଆର ଅଷ୍ଟ୍ରେଲିଆ ଗସ୍ତରେ ସବୁଠାରୁ ବଡ ପ୍ରଶ୍ନ ଥିଲା ଡେ ନାଇଟ୍ ଟେଷ୍ଟ ବିଷୟରେ | ଦୀର୍ଘ 112 ଦିନ ପରେ ଭିକ୍ଟୋରିଆରୁ ବର୍ତ୍ତମାନ ଲକଡାଉନ୍ ହଟାଇ ଦିଆଯାଇଛି, ତେଣୁ କ୍ରିକେଟ୍ ଅଷ୍ଟ୍ରେଲିଆ ଦିବରାତ୍ର ଟେଷ୍ଟକୁ ଆଡିଲେଡ୍ ଗ୍ରାଉଣ୍ଡରୁ ସ୍ଥାନାନ୍ତର ନକରିବାକୁ ନିଷ୍ପତ୍ତି ନେଇଛି ।

ଟିମ୍ ଇଣ୍ଡିଆ ଏବଂ ଅଷ୍ଟ୍ରେଲିଆ ମଧ୍ୟରେ ଏକ ତିନି ମ୍ୟାଚ୍ ବିଶିଷ୍ଟ ଦିନିକିଆ ଏବଂ ତିନି ମ୍ୟାଚ୍ ବିଶିଷ୍ଟ ଟ୍ୱେଣ୍ଟି 20 ସିରିଜ୍ ଖେଳାଯିବ | କ୍ରିକେଟ୍ ଅଷ୍ଟ୍ରେଲିଆ କାନବେରା ଏବଂ ସିଡନୀରେ ଦୁଇଟି ଗ୍ରାଉଣ୍ଡରେ ଏହି ସିରିଜ୍ ଖେଳିବାକୁ ନିଷ୍ପତ୍ତି ନେଇଛି | ଟେଷ୍ଟ ସିରିଜ୍ କିନ୍ତୁ ଚାରୋଟି ଭିନ୍ନ ସ୍ଥାନରେ ଖେଳାଯିବ |

ଟିମ୍ ଇଣ୍ଡିଆ ଏବଂ ଅଷ୍ଟ୍ରେଲିଆ ମଧ୍ୟରେ ପ୍ରଥମ ଦିନିକିଆ ନଭେମ୍ବର 27 ରେ ସିଡନୀ କ୍ରିକେଟ୍ ଗ୍ରାଉଣ୍ଡରେ ଖେଳାଯିବ, ଦ୍ୱିତୀୟ ଦିନିକିଆ ନଭେମ୍ବର 29 ରେ ସମାନ ଗ୍ରାଉଣ୍ଡରେ ଅନୁଷ୍ଠିତ ହେବ | ତୃତୀୟ ଦିନିକିଆ 2 ଡିସେମ୍ବରରେ କାନବେରାରେ ଅନୁଷ୍ଠିତ ହେବ, 4 ଡିସେମ୍ବରରେ ପ୍ରଥମ ଟ୍ୱେଣ୍ଟି ଟ୍ୱେଣ୍ଟି ମ୍ୟାଚ୍ ଏହି ଗ୍ରାଉଣ୍ଡରେ ଖେଳାଯିବ | ଟିମ୍ ଇଣ୍ଡିଆ ପୁଣି ଦ୍ୱିତୀୟ ଏବଂ ତୃତୀୟ ଟି ଟ୍ୱେଣ୍ଟି ପାଇଁ ସିଡନୀକୁ ଫେରିବ ଏବଂ 6 ଡିସେମ୍ବର ଏବଂ 8 ଡିସେମ୍ବରରେ ଏହା ଅନୁଷ୍ଠିତ ହେବ |

ସିଡନୀରେ ଟିମ୍ ଇଣ୍ଡିଆ ମଧ୍ୟ 6 ରୁ 8 ଡିସେମ୍ବର ଏବଂ 11 ରୁ 13 ଡିସେମ୍ବର ମଧ୍ୟରେ ଦୁଇଟି ଅଭ୍ୟାସ ମ୍ୟାଚ୍ ଖେଳିବ | ଦ୍ୱିତୀୟ ଅଭ୍ୟାସ ମ୍ୟାଚ୍ କେବଳ ଡେ ନାଇଟ୍ ଫର୍ମାଟରେ ଅନୁଷ୍ଠିତ ହେବ |

ଉଭୟ ଦଳର ପ୍ରଥମ ଟେଷ୍ଟ 17 ରୁ 21 ଡିସେମ୍ବର ମଧ୍ୟରେ ଆଡିଲେଡ୍ ଓଭାଲ୍ ଗ୍ରାଉଣ୍ଡରେ ହେବ | 26 ଡିସେମ୍ବରରୁ ମେଲବୋର୍ଣ୍ଣରେ ବକ୍ସିଂ ଡେ ଟେଷ୍ଟ ମ୍ୟାଚ୍ ଖେଳାଯିବ | ତୃତୀୟ ଟେଷ୍ଟ ମ୍ୟାଚ୍ 7 ଜାନୁୟାରୀରୁ 11 ଜାନୁୟାରୀ ପର୍ଯ୍ୟନ୍ତ ସିଡନୀ କ୍ରିକେଟ୍ ଗ୍ରାଉଣ୍ଡରେ ଅନୁଷ୍ଠିତ ହୋଇଥିବାବେଳେ ଦୁଇ ଦଳ ମଧ୍ୟରେ ଚାରି ଟେଷ୍ଟ ସିରିଜର ଶେଷ ମ୍ୟାଚ୍ 15 ଜାନୁୟାରୀରୁ ଗାବାରେ ଖେଳାଯିବ |