ସାଉଦି ଆରବ ଅଧ୍ୟକ୍ଷତାରେ ଅନୁଷ୍ଠିତ ପଞ୍ଚଦଶ ଜି-୨୦ ଶିଖର ସମ୍ମିଳନୀରେ ଭର୍ଚୁଆଲ ମାଧ୍ୟମରେ ଯୋଗ ଦେଇ ପ୍ରଧାନମନ୍ତ୍ରୀ ମୋଦୀ କହିଥିଲେ ଯେ, ଆମେ ଆମ ଦେଶ ଭାରତରେ ଏଲଇଡି ଲାଇଟକୁ ଲୋକପ୍ରିୟ କରାଇଛୁ। ଯାହା ଦ୍ବାରା ଆମେ କାର୍ବନ ଡାଇଅକ୍ସାଇଡ ନିର୍ଗମନ ବର୍ଷକୁ ୩୮ ନିୟୁତ ଟନ୍ କୁ ହ୍ରାସ କରିଛୁ। କେବଳ ସେତିକି ନୁହେଁ ଉଜ୍ଵଳା ଯୋଜନା ମାଧ୍ୟମରେ ୮ କୋଟିରୁ ଅଧିକ ଘରକୁ ରନ୍ଧନ ଗ୍ୟାସ୍ ଯୋଗାଇ ଧୂଆଁମୁକ୍ତ ରୋଷେଇ ଘର ଯୋଗାଇଛୁ।
ଶନିବାର ଠାରୁ ଆରମ୍ଭ ହୋଇଥିବା ପଞ୍ଚଦଶ ଜି-୨୦ ଶିଖର ସମ୍ମିଳନୀରେ ପ୍ରଧାନମନ୍ତ୍ରୀ ମୋଦୀ ରବିବାର ଭର୍ଚୁଆଲ ମାଧ୍ୟମରେ ଯୋଗ ଦେଇ ଆହୁରୀ ମଧ୍ୟ କହିଛନ୍ତି ଯେ ଆମେ ୨୦୨୨ ପୂର୍ବରୁ ୧୭୫ ଗିଗାବାଇଟର ଅକ୍ଷୟ ଶକ୍ତି ଲକ୍ଷ୍ୟ ହାସଲ କରିବୁ। ବର୍ତ୍ତମାନ ଆମେ ଏହାକୁ ୨୦୩୦ ସୁଦ୍ଧା ୪୫୦ ଗିଗାବାଇଟକୁ ବୃଦ୍ଧି କରିବାକୁ ଏକ ଲକ୍ଷ୍ୟ ସ୍ଥିର କରିଛୁ। ସେ କହିଛନ୍ତି ଯେ ଏହି ସମୟ ମଧ୍ୟରେ ବିଶ୍ୱ ଜଳବାୟୁ ପରିବର୍ତ୍ତନ ଉପରେ ମଧ୍ୟ ଧ୍ୟାନ ଦେବା ଉଚିତ୍। ଜଳବାୟୁ ପରିବର୍ତ୍ତନକୁ ମୁକାବିଲା କରିବାରେ ଦେଶମାନେ ପୃଥକ ଭାବରେ ନୁହେଁ ବରଂ ଏକତ୍ରୀତ, ସମନ୍ୱିତ ଏବଂ ବ୍ୟାପକ ଭାବରେ ମୁକାବିଲା କରାଯିବା ଆବଶ୍ୟକ।
ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ପରିବେଶ ପ୍ରତି ଆମର ପ୍ରତିବଦ୍ଧତା ରହିଛି। ଅଙ୍ଗାରକାମ୍ଳର ସର୍ବନିମ୍ନ ବ୍ୟବହାର ଏବଂ ଜଳବାୟୁ ପରିବର୍ତ୍ତନର ବିକାଶ ଉପରେ ଭାରତ ଗୁରୁତ୍ୱ ଦେଉଛି, ଯାହା କେବଳ ପ୍ୟାରିସ୍ ଚୁକ୍ତିନାମାର ଲକ୍ଷ୍ୟ ପୂରଣ କରୁନାହିଁ ବରଂ ଏହାଠାରୁ ଆହୁରୀ ଆଗକୁ ବଢି କାର୍ଯ୍ୟ କରୁଛି। ୨୦୩୦ ସୁଦ୍ଧା ଆମେ ୨୬ ମିଲିୟନ ହେକ୍ଟର ଜମି ପୁନ-ଚାଷ ପାଇଁ ଉପଯୁକ୍ତ କରିବାକୁ ଲକ୍ଷ୍ୟ ରଖିଛୁ। ଆମେ ଏକ ଚକ୍ରୀୟ ଅର୍ଥବ୍ୟବସ୍ଥାକୁ ଉତ୍ସାହିତ କରୁଛୁ । ଆମେ କୋଟି କୋଟି ଟଙ୍କା ସଂଗ୍ରହ କରିଛୁ, ଯାହା ଦ୍ବାରା ହଜାର ହଜାର ହିତାଧିକାରୀଙ୍କୁ ତାଲିମ ଦେବା ଏବଂ ଅକ୍ଷୟ ଶକ୍ତିରେ ଗବେଷଣା ଏବଂ ବିକାଶକୁ ପ୍ରୋତ୍ସାହିତ କରିବାକୁ ଯୋଜନା କରୁଛୁ। ଅଙ୍ଗାରକାମ୍ଳ ନିର୍ଗମନ ହ୍ରାସ କରିବାରେ ଆନ୍ତର୍ଜାତୀୟ ସୋଲାର ଆଲାଇନ୍ସ ଅତ୍ୟନ୍ତ ସହାୟକ ହେବ ବୋଲି ପ୍ରଧାନମନ୍ତ୍ରୀ ମୋଦୀ କହିଛନ୍ତି।
