Breaking PLUSଓଡ଼ିଶାମୁଖ୍ୟ ଖବର

ନିଲାମ ହେବ ଓଡ଼ିଶାର ୧୪ କୋଇଲା ଖଣି

କେନ୍ଦ୍ର ସରକାର ଦ୍ୱିତୀୟ ପର୍ଯ୍ୟାୟରେ ଗୁରୁବାର ୬ ରାଜ୍ୟର ୬୭ଟି କୋଇଲା ଖଣିକୁ ବ୍ୟବସାୟିକ ଉତ୍ପାଦନ ଲାଗି ନିଲାମ କରିବାକୁ ଚୂଡ଼ାନ୍ତ ନିଷ୍ପତ୍ତି ନେଇଛନ୍ତି। ଛତିଶଗଡ଼, ଝାଡ଼ଖଣ୍ଡ, ଓଡ଼ିଶା, ମଧ୍ୟପ୍ରଦେଶ, ମହାରାଷ୍ଟ୍ର ଏବଂ ଆନ୍ଧ୍ର ପ୍ରଦେଶର ଉକ୍ତ କୋଇଲା ଖଣିଗୁଡ଼ିକୁ ନିଲାମ କରାଯିବ। ସେଥିରୁ ଓଡ଼ିଶାର ୧୪ଟି କୋଲ୍‌ ବ୍ଲକ ରହିଛି।

କେନ୍ଦ୍ର ସରକାର ଦ୍ୱିତୀୟ ପର୍ଯ୍ୟାୟରେ ଗୁରୁବାର ୬ ରାଜ୍ୟର ୬୭ଟି କୋଇଲା ଖଣିକୁ ବ୍ୟବସାୟିକ ଉତ୍ପାଦନ ଲାଗି ନିଲାମ କରିବାକୁ ଚୂଡ଼ାନ୍ତ ନିଷ୍ପତ୍ତି ନେଇଛନ୍ତି। ଛତିଶଗଡ଼, ଝାଡ଼ଖଣ୍ଡ, ଓଡ଼ିଶା, ମଧ୍ୟପ୍ରଦେଶ, ମହାରାଷ୍ଟ୍ର ଏବଂ ଆନ୍ଧ୍ର ପ୍ରଦେଶର ଉକ୍ତ କୋଇଲା ଖଣିଗୁଡ଼ିକୁ ନିଲାମ କରାଯିବ। ସେଥିରୁ ଓଡ଼ିଶାର ୧୪ଟି କୋଲ୍‌ ବ୍ଲକ ରହିଛି। ସେହି କୋଲ୍‌ ବ୍ଲକଗୁଡ଼ିକ ହେଲା ମାଛକଟା, ମହାନଦୀ, ନୂଆଗଁା ତେଲିସାହି, ରାମଚଣ୍ଡୀ ପ୍ରମୋଶନ ବ୍ଲକ, ଅଳକାନନ୍ଦା, ବରତାପ, ବୁରାପାହାଡ଼, ଡିପ୍‌ ଏକ୍ସଟେନଶନ ଅଫ୍‌ ବେଲପାହାଡ଼, ଡିପ୍‌ ସାଇଡ୍‌ ଅଫ୍‌ ଛତାବର, କରଦାବାହାଲ-ବ୍ରାହ୍ମଣବିଲ, କୋଶଳ ଓ୍ବେଷ୍ଟ, ଫୁଲଝରି ଇଷ୍ଟ ଆଣ୍ଡ୍‌ ଓ୍ବେଷ୍ଟ, ସାରଦାପୁର ନର୍ଥ ଏବଂ ତେନ୍ତୁଳୋଇ।
ଘୋଷିତ ସମୁଦାୟ ୬୭ଟି କୋଲ୍‌ ବ୍ଲକ ମଧ୍ୟରୁ ୩୭ଟିରୁ ସମ୍ପୂର୍ଣ୍ଣ ଉତ୍ପାଦନ ହେଉଥିବା ବେଳେ ଅବଶିଷ୍ଟଗୁଡ଼ିକରୁ ଆଂଶିକ ଉତ୍ପାଦନ ହେଉଛି। କୋଇଲା ଖଣିଗୁଡ଼ିକ ମଧ୍ୟରେ କ୍ଷୁଦ୍ର ଓ ବୃହତ୍‌ କୋଲ୍‌ ବ୍ଲକ ରହିଛି। ସେଥିରେ କୁକିଂ ଓ ନନ୍‌ କୁକିଂ ଖଣି ରହିଥିବା କୋଇଲା ମନ୍ତ୍ରଣାଳୟ ପକ୍ଷରୁ ଜାରି ବିଜ୍ଞପ୍ତିରେ କୁହାଯାଇଛି। ଆତ୍ମନିର୍ଭର ଭାରତ ଦିଗରେ ଏହା ଏକ ପଦକ୍ଷେପ ଦର୍ଶାଯାଇ ମନ୍ତ୍ରଣାଳୟ ପକ୍ଷରୁ କୁହାଯାଇଛି ଯେ, ୨୦୧୪ ପରଠାରୁ କୋଲ୍‌ ବ୍ଲକ ନିଲାମ ପ୍ରକ୍ରିୟା ଆରମ୍ଭ ହେବା ଠାରୁ ଦ୍ୱିତୀୟ ପର୍ଯ୍ୟାୟରେ ସର୍ବାଧିକ ସଂଖ୍ୟକ ଖଣିକୁ ନିଲାମ ଲାଗି ପ୍ରସ୍ତୁତି ଶେଷ ହୋଇଛି।
ଦେଶରେ ଆର୍ଥିକ କାର୍ଯ୍ୟକଳାପକୁ ତ୍ୱରାନ୍ବିତ କରିବାରେ କୋଇଲା ପ୍ରମୁଖ ସମ୍ବଳ। ଦେଶର ଅବ୍ୟବହୃତ ସମ୍ପଦର ବିନିଯୋଗ କରି ନିଜର ବ୍ୟବସାୟ ବଢାଇବା ସହ ଦେଶର ଅଭିବୃଦ୍ଧି ଲାଗି ପୁଞ୍ଜିନିବେଶକାରୀଙ୍କୁ ଆମନ୍ତ୍ରଣ କରାଯାଇଛି ବୋଲି କେନ୍ଦ୍ର କୋଇଲା ମନ୍ତ୍ରୀ ପ୍ରହଲ୍ଲାଦ ଯୋଶୀ କହିଛନ୍ତି। ବ୍ୟବସାୟିକ କୋଇଲା ଉତ୍ପାଦନ ନୂତନ ପୁଞ୍ଜିନିବେଶ ପାଇଁ ପଥ ପରିଷ୍କାର କରିବା ସହ ବହୁ ସଂଖ୍ୟାରେ ନିଯୁକ୍ତି ସୁଯୋଗ ସୃଷ୍ଟି କରିବ। କୋଇଲା ଖଣି ଥିବା ରାଜ୍ୟଗୁଡିକର ସାମାଜିକ, ଆର୍ଥିକ ଅଭିବୃଦ୍ଧି ଦିଗରେ ଏହା ସହାୟତା କରିବ। ବଜାରଭିତ୍ତିକ କୋଇଲା ଅର୍ଥନୀତି କୋଇଲା କ୍ଷେତ୍ରରେ ଦେଶକୁ ଆତ୍ମନିର୍ଭର କରିବ ବୋଲି ସେ କହିଛନ୍ତି। କୋଇଲା ହେଉଛି ପ୍ରଥମ ଖଣିଜ ସମ୍ପଦ, ଯାହାକୁ କି ରୋଲିଂ ଅକ୍ସନ କରାଯାଇଛି। ଆଗାମୀ ଦିନରେ କେନ୍ଦ୍ର ସରକାର ନିଲାମ ପାଇଁ ରୋଲିଂ ଅକ୍ସନ ବ୍ୟବସ୍ଥାକୁ କାର୍ଯ୍ୟକାରୀ କରିବେ। ଏହାଦ୍ୱାରା ସବୁ ସମୟ ପାଇଁ କୋଇଲା ଉପଲବ୍ଧ ହୋଇପାରିବ ବୋଲି ମନ୍ତ୍ରୀ କହିଛନ୍ତି। ତେବେ ଭବିଷ୍ୟତରେ ହେବାକୁ ଥିବା ନିଲାମ ପାଇଁ ରୋଲିଂ ଅକ୍ସନ ଜରିଆରେ ଖଣି ବିଷୟରେ ସବିଶେଷ ବୈଷୟିକ ଜ୍ଞାନ ଉପଲବ୍ଧ ରହିବ। ଫଳରେ ନିଲାମରେ ଭାଗ ନେବାକୁ ଚାହୁଁଥିବା ସଂସ୍ଥାଗୁଡିକ ନିଜ ପସନ୍ଦ ମୁତାବକ ଖଣି ପାଇଁ ଟେଣ୍ଡର ପକାଇପାରିବେ ବୋଲି ମନ୍ତ୍ରୀ କହିଛନ୍ତି। ଏହାଦ୍ୱାରା ଆବେଦନକାରୀଙ୍କୁ ଉତ୍ତମ ଯୋଜନା ପ୍ରସ୍ତୁତ କରିବାରେ ସହାୟକ ହେବା ସହ ନିଲାମରେ ସ୍ବଚ୍ଛତା ବଜାୟ ରହିପାରିବ ବୋଲି ମନ୍ତ୍ରୀ କହିଛନ୍ତି। ବ୍ୟବସାୟିକ କୋଇଲା ଉତ୍ପାଦନ ସହ ସରକାର କୋଲ୍‌ ଇଣ୍ଡିଆ ଲିମିଟେଡ(ସିଆଇଏଲ୍‌) ପାଇଁ ଇ-ଅକ୍ସନ ବ୍ୟବସ୍ଥା ଉପରେ ବିଚାର କରୁଛନ୍ତି। ଏହାଦ୍ୱାରା ସିଆଇଏଲ୍‌ ବିଭିନ୍ନ ପ୍ରକାର ନିଲାମକୁ ଗୋଟିଏ ଓ୍ବିଣ୍ଡୋ ମାଧ୍ୟମରେ କରିପାରିବ। ଏହାଦ୍ୱାରା ଗୋଟିଏ କୋଇଲା ଗ୍ରେଡ୍‌ ପାଇଁ ଗୋଟିଏ ପ୍ରକାର ମୂଲ୍ୟ ଧାର୍ଯ୍ୟ କରାଯାଇପାରିବ। ଦେଶର କୋଇଲା କ୍ଷେତ୍ରରେ ବ୍ୟବସାୟିକ କୋଇଲା ଉତ୍ପାଦନ ଏକ ବିପ୍ଳବାତ୍ମକ ପଦକ୍ଷେପ। ଭାରତୀୟ କୋଇଲା କ୍ଷେତ୍ର ସକାଶେ ଏହା ପ୍ରମୁଖ ଖଣିଲିଜଧାରୀମାନଙ୍କୁ ସର୍ବାଧୁନିକ ବୈଷୟିକ ଜ୍ଞାନକୌଶଳ ପ୍ରୟୋଗ ଏବଂ ମୂଲ୍ୟ ଉପରେ ପ୍ରତିଯୋଗିତା କରିବାର ସୁଯୋଗ ସୃଷ୍ଟି କରିବ।
ଭାରତୀୟ କୋଇଲା ଉତ୍ପାଦନ କ୍ଷେତ୍ରରେ ବ୍ୟାପକ ଉନ୍ନତି ହେବା ସହ ଆଧୁନିକୀକରଣ ହୋଇପାରିବ ବୋଲି ନୀତି ଆୟୋଗ ସିଇଓ ଅମିତାଭ କାନ୍ତ କହିଛନ୍ତି। ଏଠାରେ ସୂଚନାଯୋଗ୍ୟ ଯେ ଗତବର୍ଷ ବ୍ୟବସାୟିକ କୋଇଲା ପାଇଁ ନିଲାମ କରାଯାଇଥିଲା। ୯.୫ ପ୍ରତିଶତରୁ ୬୬.୭୫ ପ୍ରତିଶତ ମାଧ୍ୟମରେ ନିଲାମ କରାଯାଇଥିଲା। ଏହି କୋଇଲା ଖଣିରୁ ରାଜ୍ୟଗୁଡିକୁ ପ୍ରାୟ ୭ ହଜାର କୋଟି ଟଙ୍କାର ରାଜସ୍ବ ମିଳିବ ବୋଲି ଅନୁମାନ କରାଯାଉଛି।

Show More

Related Articles

Back to top button