ଭୁବନେଶ୍ବର: ଓଡ଼ିଶା ସରକାରୀ ଆଇଟିଆଇ ପ୍ରଶିକ୍ଷକ ସେବା ନିୟମରେ ସରକାର ସଂଶୋଧନ କରିଛନ୍ତି। ଏ ନେଇ ମଙ୍ଗଳବାର ଦକ୍ଷତା ବିକାଶ ଓ ବୈଷୟିକ ଶିକ୍ଷା ବିଭାଗ ପକ୍ଷରୁ ବିଜ୍ଞପ୍ତି ଜାରି କରାଯାଇଛି। ଏଥିରେ କୁହାଯାଇଛି ଯେ ଉପ-ପ୍ରଶିକ୍ଷଙ୍କ ପଦ ପୂରଣ ସମୟରେ ସର୍ବନିମ୍ନ ୫୦% ଆସନ ଏନ୍ଟିସି/ଏନ୍ଏସି/ଆଇଟିଆଇ ବର୍ଗର ଯୋଗ୍ୟ ପ୍ରାର୍ଥୀଙ୍କୁ ନେଇ ପୂରଣ କରାଯିବ। ସେହିପରି ସର୍ବାଧିକ ୫୦% ଆସନ ଯୋଗ୍ୟ ଡିପ୍ଲୋମା, ଡିଗ୍ରୀ ବର୍ଗରୁ ପଦୋନ୍ନତି ଜରିଆରେ ପୂରଣ କରାଯିବ। ପ୍ରଶିକ୍ଷଣ ଅଧିକାରୀ ପଦ ପାଇଁ ସର୍ବନିମ୍ନ ୫୦%ଙ୍କୁ ଉପ ପ୍ରଶିକ୍ଷଣ ଅଧିକାରୀ ବର୍ଗର ପ୍ରାର୍ଥୀଙ୍କୁ ନେଇ ପୂରଣ କରାଯାଇ ପାରିବ। ଓପିଏସ୍ସି ଜରିଆରେ ସର୍ବନିମ୍ନ ୫୦% ଅଧ୍ୟକ୍ଷ ଏବଂ ଉପାଧ୍ୟକ୍ଷ ପଦ ସିଧାସଳଖ ନିଯୁକ୍ତି ଜରିଆରେ ପୂରଣ କରାଯିବ। ସେହିପରି ସର୍ବାଧିକ ୫୦% ଅଧ୍ୟକ୍ଷ, ଉପାଧ୍ୟକ୍ଷ ପଦ ପ୍ରଶିକ୍ଷଣ ଅଧିକାରୀଙ୍କୁ ପଦୋନ୍ନତି ଦେଇ ପୂରଣ କରାଯିବ। ଯୁଗ୍ମ ନିର୍ଦେଶକଙ୍କ ପଦ ମଧ୍ୟ ପଦୋନ୍ନତି ଜରିଆରେ ପୂରଣ ହେବ। ପଦୋନ୍ନତି ସମୟରେ ବରିଷ୍ଠତାକୁ ଅଗ୍ରାଧିକାର ଦିଆଯିବ ବୋଲି ବିଜ୍ଞପ୍ତିରେ କୁହାଯାଇଛି।
