କଟକ : ଏଣିକି ମାଟ୍ରିକ ପରୀକ୍ଷା ପ୍ରଶ୍ନପତ୍ର ପ୍ରଘଟ କରୁଥିବା ବ୍ୟକ୍ତି ଧରାପଡ଼ିବେ। କିଏ ଏବଂ କେଉଁ ପରୀକ୍ଷା କେନ୍ଦ୍ରରୁ ପ୍ରଶ୍ନପତ୍ରକୁ ପ୍ରଘଟ କରିଛି ତାହା ଜଣାପଡ଼ିବ। ଆସନ୍ତା ଫେବୃଆରୀ ୨୧ରେ ରାଜ୍ୟରେ ଦଶମ ଶ୍ରେଣୀ ଛାତ୍ରଛାତ୍ରୀଙ୍କ ମାଟ୍ରିକ ପରୀକ୍ଷା ଆରମ୍ଭ ହେବାକୁ ଥିବାବେଳେ ଚଳିତବର୍ଷ ଠାରୁ ପ୍ରଶ୍ନପତ୍ରରେ ସବୁ ପୃଷ୍ଠାରେ ୱାର୍ଟରମାର୍କ ଲାଗିବ। ଯେଉଁଥିରେ ପରୀକ୍ଷାର୍ଥୀଙ୍କ ରୋଲ ନମ୍ବର ଏବଂ ପରୀକ୍ଷା କେନ୍ଦ୍ର ବିଷୟରେ ଜାଣିହେବ। ଏହାକୁ ବୋର୍ଡର ପରୀକ୍ଷା ପରିଚାଳନା କମିଟି ଦ୍ବାରା ଅନୁମୋଦନ ମିଳିସାରିଛି। ପରୀକ୍ଷାମୂଳକ ଭାବେ ଏହି ବ୍ୟବସ୍ଥାକୁ ଆସନ୍ତା ୧୭ ତାରିଖ ଠାରୁ ହେବାକୁ ଥିବା ଓଡ଼ିଶା ମାଧ୍ୟମିକ ବିଦ୍ୟାଳୟ ଶିକ୍ଷକ ଯୋଗ୍ୟତା ପରୀକ୍ଷା (ଓଏସଏସଟିଇଟି)ରେ ଲାଗୁ କରାଯାଇଛି। ଏହାଦ୍ବାରା ପ୍ରତିବର୍ଷ ପରୀକ୍ଷା ସମୟରେ ପ୍ରଶ୍ନପତ୍ର ପ୍ରଘଟକୁ ନେଇ ଆସୁଥିବା ଅଭିଯୋଗ ଦୂର କରାଯିବା ସହ ପରୀକ୍ଷା ପରିଚାଳନାରେ ସ୍ବଚ୍ଛତା ରହିପାରିବ ବୋଲି ବୋର୍ଡ କର୍ତ୍ତୃପକ୍ଷ କହିଛନ୍ତି।
