ସଂସଦର ସ୍ୱତନ୍ତ୍ର ଅଧିବେଶନର ଆଜି ତୃତୀୟ ଦିନ । ଗତକାଲି ମହିଳା ସଂରକ୍ଷଣ ବିଲ୍ ଆଗତ କରିଛନ୍ତି ସରକାର । ଆଉ ଆଜି ମଧ୍ୟ ସରକାର ଆଉ କିଛି ବିଲ୍ ଆଗତ କରିପାରନ୍ତି । ଅନ୍ୟପଟେ ମହିଳା ବିଲରେ ଓବିସିଙ୍କ ପାଇଁ ସଂରକ୍ଷଣ ଦାବି ନେଇ ଚର୍ଚ୍ଚା ବଢିଛି । ୧୯୯୬ରେ ଯୁଗ୍ମ ସଂସଦୀୟ କମିଟି ରିପୋର୍ଟରେ ମହିଳା ସଂରକ୍ଷଣ ପାଇଁ ସମ୍ବିଧାନ ସଂଶୋଧନ ହେବା ପରେ ଓବିସି ମହିଳାଙ୍କ ପାଇଁ ସଂରକ୍ଷଣ ବ୍ୟବସ୍ଥା କରିବାକୁ ସୁପାରିସ କରାଯାଇଥିଲା । ଏହାସହ ରାଜ୍ୟସଭା ଓ ବିଧାନ ପରିଷଦରେ ସଂରକ୍ଷଣ ବ୍ୟବସ୍ଥାକୁ ବୃଦ୍ଧି କରିବା ପାଇଁ ମଧ୍ୟ ସୁପାରିସ କରାଯାଇଛି । ଏହି ସୁପାରିସଗୁଡ଼ିକ ମଧ୍ୟରୁ କୌଣସିଟି ୨୦୧୦ ବିଲ୍ କିମ୍ବା ସଦ୍ୟତମ ସୁପାରିସରେ ଅନ୍ତର୍ଭୁକ୍ତ କରାଯାଇ ନାହିଁ । ସମ୍ବିଧାନରେ ଲୋକସଭା ଓ ବିଧାନସଭାରେ ଓବିସି ଆସନ ପାଇଁ ସଂରକ୍ଷଣ ବ୍ୟବସ୍ଥା ନାହିଁ । ଆଇନ ଓ ନ୍ୟାୟ ସମ୍ପର୍କିତ ସଂସଦୀୟ ଷ୍ଟାଣ୍ଡିଂ କମିଟି ଜୟନ୍ତୀ ନଟରାଜନଙ୍କ ନେତୃତ୍ୱରେ ବସିଥିଲା । ଏହାର ରିପୋର୍ଟ ଡିସେମ୍ବର ୨୦୦୯ରେ ସଂସଦରେ ଉପସ୍ଥାପିତ ହୋଇଥିଲା । ଯେଉଁଥିରେ ମହିଳା ସଂରକ୍ଷଣ ଭିତରେ ଓବିସି ମହିଳା ଏବଂ କିଛି ସଂଖ୍ୟାଲଘୁଙ୍କ ପାଇଁ ସଂରକ୍ଷଣ ପାଇଁ ପ୍ରସ୍ତାବ ଦିଆଯାଇଥିଲା । ଯାହାକୁ ନେଇ ବିତର୍କ ସୃଷ୍ଟି ହୋଇଥିଲା । ସଂରକ୍ଷଣ ମଧ୍ୟରେ ଏଭଳି ଓବିସି ସଂରକ୍ଷଣ ପ୍ରଦାନ କରାଯିବା ଉଚିତ ବୋଲି ଗୋଟିଏ ବର୍ଗର ଦୃଢ଼ ମତ ରହିଛି ।ଏ ହି ପ୍ରସଙ୍ଗକୁ ସରକାର ବିଚାରକୁ ନେଇ ଉଚିତ ସମୟରେ ପଦକ୍ଷେପ ନେବା ଉଚିତ ବୋଲି କମିଟି ମତ ଦେଇଥିଲା । ଗୀତା ମୁଖାର୍ଜୀଙ୍କ ନେତୃତ୍ୱରେ ଗଠିତ କମିଟି ଏହି ରିପୋର୍ଟରେ ଉଲ୍ଲେଖ କରିଛନ୍ତି, ଯାହା ୧୯୯୬ ବିଲ ଉପରେ ନଜର ପକାଇଥିଲା, ସେ ସୁପାରିଶ କରିଥିଲେ ଯେ ସରକାର ସଂରକ୍ଷଣର ଲାଭ ପ୍ରଦାନ କରିବା ଉପରେ ବିଚାର କରିପାରନ୍ତି । ବିଜେପି ନେତା ଉମା ଭାରତୀ ମଧ୍ୟ ଏ ସମ୍ପର୍କରେ ଦାବି କରିଛନ୍ତି । ମହିଳା ସଂରକ୍ଷଣ ବିଲରେ ଏସସି-ଏସଟି ସହିତ ଓବିସି ମହିଳାଙ୍କ ପାଇଁ ସଂରକ୍ଷଣ ବ୍ୟବସ୍ଥା ରହିବା ଉଚିତ ।
