ସଂଗ୍ରହାଳୟଗୁଡିକ ବିଭିନ୍ନ ରାଷ୍ଟ୍ରର ସଂସ୍କୃତି ଏବଂ ଐତିହ୍ୟକୁ ସଂରକ୍ଷିତ ରଖି ପିଢି ପରେ ପିଢି ସେ ସମ୍ପର୍କରେ ଜନସାଧାରଣଙ୍କୁ ଜ୍ଞାନ ବିତରଣ କରିବାରେ କିଭଳି ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରୁଛି, ସେହି ସଚେତନତା ଜାଗ୍ରତ କରିବା ଏହି ଦିବସର ଉଦ୍ଦେଶ୍ୟ। ୧୯୭୭ ଠାରୁ ଏହି ଦିବସ ପାଳିତ ହୋଇଆସୁଛି। ସଂଗ୍ରହାଳୟଗୁଡିକ କେବଳ ବଡ ବଡ କୋଠା ନୁହେଁ କିମ୍ବା ଏହାର କିଛି ସୀମା ସରହଦ ନାହିଁ। ଏହା ସାଂସ୍କୃତିକ ବିନିମୟ, ସଂସ୍କୃତିକୁ ସମୃଦ୍ଧ କରିବା ଏବଂ ଜନସାଧାରଣଙ୍କ ମଧ୍ୟରେ ପାରସ୍ପରିକ ବୁଝାମଣା, ସହଯୋଗ ତଥା ଶାନ୍ତିଭାବ ବିକାଶର ଏକ ଗୁରୁତ୍ୱପୂର୍ଣ୍ଣ ମାଧ୍ୟମ ହୋଇଛି।
ଏହି ଦିବସରେ ବିଶ୍ୱର ବିଭିନ୍ନ ସ୍ଥାନରେ କାର୍ଯ୍ୟକ୍ରମ ଆୟୋଜିତ ହୋଇଥାଏ ଏବଂ ସେଥିରେ ସଂଗ୍ରହାଳୟଗୁଡିକ ଅଂଶଗ୍ରହଣ କରିଥାନ୍ତି। ଗତବର୍ଷ ପ୍ରାୟ ୧୫୮ଟି ରାଷ୍ଟ୍ରରେ ୩୭ ହଜାରରୁ ଅଧିକ ସଂଗ୍ରହାଳୟ ଏହିଭଳି କାର୍ଯ୍ୟକ୍ରମରେ ଭାଗ ନେଇଥିଲେ।
ଆମ ଦେଶର ବିଭିନ୍ନ ସ୍ଥାନରେ ମଧ୍ୟ ସଂଗ୍ରହାଳୟଗୁଡିକ ରହିଛି। କୋଲକାତାରେ ଥିବା ସଂଗ୍ରହାଳୟ ଏସୀୟ-ପ୍ରଶାନ୍ତ ମହାସାଗରୀୟ ଅଞ୍ଚଳରେ ସର୍ବବୃହତ ଭାବେ ବିବେଚିତ ହେଉଛି। ଏଥିସହିତ ରାଜଧାନୀ ନୂଆଦିଲ୍ଲୀ ଏବଂ ହାଇଦରାବାଦରେ ରହିଛି ନ୍ୟାସନାଲ ମ୍ୟୁଜିୟମ। ଆମ ରାଜ୍ୟର ରାଜଧାନୀ ଭୁବନେଶ୍ୱରରେ ମଧ୍ୟ ରହିଛି ଆଞ୍ଚଳିକ ସଂଗ୍ରହାଳୟ।
