ଦେଶ ବିଦେଶ

୨୧ ଦିନ ମଧ୍ୟରେ ନେଇ ପାରିବେ ସ୍ପୁଟନିକ୍-ଭିର ଦୁଇଟି ଡୋଜ୍, ଜାଣନ୍ତୁ କେତେ ପ୍ରଭାବଶାଳୀ ଟିକା

ନୂଆଦିଲ୍ଲୀ: କୋଭକ୍ସିନ୍ ଓ କୋଭିସିଲ୍ଡ ପରେ ଭାରତ କରୋନା ବିରୋଧରେ ଯୁଦ୍ଧ ପାଇଁ ଋଷ ନିର୍ମିତ ସ୍ପୁଟନିକକୁ ବାଛିଛି । ସ୍ପୁଟନିକକୁ ଜରୁରୀକାଳୀନ ବ୍ୟବହାର ପାଇଁ ଭାରତ ସରକାର ଅନୁମତି ଦେଇଛନ୍ତି । ଏବେ ଏହି ମହାମାରୀ ବିରୋଧରେ ତିନୋଟି ଅସ୍ତ୍ରକୁ ଭାରତ ବ୍ୟବହାର କରିବ । ତେବେ ଆସନ୍ତୁ ଜାଣିବା ସ୍ପୁଟନିକ୍ ବାକି କରୋନା ଟିକାଠାରୁ କେମିତି ଓ କାହିଁକି ଅଲଗା ।

ସ୍ପୁଟନିକ୍-ଭି (ଲିକ୍ୱିଡ୍)କୁ ମାଇନସ୍ ୧୮ ଡିଗ୍ରୀ ତାପମାନରେ ଷ୍ଟୋର କରାଯାଇଥାଏ । ତେବେ ଏହି ଟିକାର ଶୁଷ୍କ ରୂପକୁ ୨ରୁ ୮ ଡିଗ୍ରୀ ତାପମାତ୍ରାରେ ଷ୍ଟୋର କରାଯାଇ ପାରିବ । ଏଥିପାଇଁ କୋଲ୍ଡ ଚେନ୍ ଭିତ୍ତିଭୂମିର ଆବଶ୍ୟକତା ନାହିଁ ।

ଆରଡିଆଇଏଫ୍ ଅନୁସାରେ ସ୍ପୁଟନିକ୍ ଭିକୁ ୫୫ ଦେଶର ୧୫୦ କୋଟିରୁ ଅଧିକ ଲୋକଙ୍କ ବ୍ୟବହାର ପାଇଁ ଅନୁମୋଦନ ମିଳିଛି । ଭ୍ୟାକ୍ସିନର ଦାମ୍ ଡୋଜ୍ ପିଛା ୧୦ ଡଲାରରୁ କମ୍ ରଖିବାକୁ ବିଚାର କରାଯାଉଛି । ତେବେ ଭାରତରେ ଏହି ଟିକା ଡୋଜ୍ ପ୍ରତି କେତେ ଟଙ୍କା ପଡ଼ିବ ସେନେଇ ଏପର୍ଯ୍ୟନ୍ତ କୌଣସି ନିଷ୍ପତ୍ତି ନିଆଯାଇ ନାହିଁ ।

କୋଭାକ୍ସିନ୍ ଓ କୋଭିସିଲ୍ଡ ଭଳି ଏହି ଟିକାକୁ ୧୮ ବର୍ଷରୁ ଅଧିକ ବୟସର ବ୍ୟକ୍ତି ନେଇ ପାରିବେ । ତେବେ ଭାରତରେ ଏବେ କେବଳ ୪୫ ବର୍ଷରୁ ଅଧିକ ବ୍ୟକ୍ତିଙ୍କୁ ଟିକା ଦିଆଯାଉଛି । ସ୍ପୁଟନିକ୍ ଭିର ଦୁଇଟି ଯାକ ଡୋଜ୍ ମଧ୍ୟରେ ୨୧ ଦିନର ବ୍ୟବଧାନ ରହିଛି । ତେବେ ଭାରତରେ ଏବେ ୨୮ ଦିନ ପରେ ଦ୍ୱିତୀୟ ଡୋଜ୍ ଦିଆଯାଉଛି । ଡ.ରେଡ୍ଡି ଲାବ ଏହି ଟିକାକୁ ଋଷରୁ ଆମଦାନୀ କରିବା ପାଇଁ ଚୁକ୍ତି କରିଛି ।

Tags
Show More

Related Articles

Back to top button
Close